स्याङ्जामा ६ महिने छोरीको हत्‍या गरी शौचालयमा फालेको आरोपमा आमासहित दुई जना पक्राउ

बुटवल, साउन २२ । स्याङ्जामा छ महिने छोरीको हत्या गरी शौचालयमा फालेको आरोपमा आमासहित दुई जनालाई प्रहरीले पक्राउ गरेको छ ।

पक्राउ पर्नेमा गल्याङ नगरपालिका – २ ईलुङगाकी २२ वर्षीया लक्ष्मी राना र पाल्पा रामपुर नगरपालिका – १० कुमाल गाउँका २२ वर्षीय केदार कुमाल रहेको जिल्‍ला प्रहरी कार्यालय स्याङ्जाका प्रहरी नायब उपरीक्षक रवीन्द्र खनालले जानकारी दिए । लक्ष्मीका श्रीमान मीनबहादुर तीन महिनादेखि भारतमा छन् ।

लक्ष्मी साउन १० गते घरमा कसैलाई खबर नगरी छ महिने छोरी लिएर सम्पर्कबिहीन भएकी थिइन् । उनी सम्पर्कबिहीन भएपछि ससुराले साउन १२ गते प्रहरीलाई खबर गरेका थिए । प्रहरीले लक्ष्मी रामपुरका केदारसँग भागेर विवाह गरेको भन्ने सूचना प्राप्त गर्‍यो । सोही सूचनाको आधारमा उनीहरुको खोजी गर्दै जादा लक्ष्मी गत शुक्रबार दिउँसो गल्याङ नगरपालिका – ३ गल्याङ बजारमा फेला परेकी थिइन् ।

‘पहिले लक्ष्मी फेला परिन् । उनीसँग सोधपुछ गरेपछि केदार पनि फेला परे,’ प्रहरी नायब उपरीक्षक खनालले भने, ‘बच्चा कहाँ राख्यौ त भनेर सोध्दा सुरूमा त जंगलमा फालेको भनिन् । तर त्यहाँ पनि रहेनछ ।’

प्रहरीले अनुसन्धान गर्ने क्रममा लक्ष्मीले साउन १० मध्यराति शौचालयको खाल्टोमा फालेको खुलेको हो । प्रहरीले त्यहाँ शव सडिगलिसकेको अवस्थामा फेला पारेको थियो । लक्ष्‍मी र केदारलाई नियन्त्रणमा लिएर घटनाबारे थप अनुसन्धान भइरहेको प्रहरीले जनाएको छ ।