मोरङको जहदाबाट कटेरोमा लुकाएर राखेको ३८ किलो गाँजा बरामद

मोरङ, साउन २२ । मोरङको जहदाबाट प्रहरीले घर नजिकको कटेरोमा लुकाएर राखेको ३८ किलोग्राम गाँजा बरामद गरेको छ ।

शनिबार साँझ प्लाष्टिकमा प्याक गरी बोरामा हालेर घर पछाडिको कटेरोमा लुकाएर राखेको अवस्थामा लागुऔषध गाँजा बरामद गरिएको मोरङ प्रहरीका प्रवक्ता डीएसपी दीपक श्रेष्ठले जानकारी दिए । उनका अनुसार जहदा गाउँपालिका–३ ठूलोहात्तीबन्दाका ४० वर्षीय भुसाराम राजवंशीले गाँजा लुकाएर राखेका हुन् ।

विशेष सूचनाका आधारमा इलाका प्रहरी कार्यालय रानीबाट प्रहरी निरीक्षक महेन्द्र दर्नालको नेतृत्वमा खटिएको टोलीले साँझ ६:३० बजेतिर गाँजा बरामद गरेको हो । राजवंशीको घरमा भने ताला लगाइएको थियो । उनको खोजीकार्य भइरहेको र गाँजा इलाका प्रहरी कार्यालयमा ल्याएर अनुसन्धान सुरु गरिएको डीएसपी श्रेष्ठको भनाइ छ ।