एमाले महाधिवेशन : उद्घाटन सत्रमा सहभागी प्रत्येक र्यालीमा एउटा एम्बुलेन्स, २५० जना स्वास्थ्यकर्मी
चितवन । नेकपा एमालेको १०औँ महाधिवेशनको उद्घाटन सत्रमा सहभागी हुने प्रत्येक र्यालीमा एउटा एम्बुलेन्स राखिने भएको छ । महाधिवेशन उद्घाटन अगाडि चितवनका विभिन्न ठाउँबाट सुरु हुने र्यालीसँग एम्बुलेन्स पनि रहने गरी काम भइरहेको स्वास्थ्य व्यवस्थापन समिति संयोजक भानुभक्त ढकालले जानकारी दिनुभयो ।
नवलपुरको गैँडाकोट, चितवनको केन्द्रीय बस टर्मिनल चोक, विशाल चोक, आँपटारी चोक, बेलचोक, त्रिचोक सहितबाट निस्किने र्यालीसँगै एम्बुलेन्स पनि रहने ढकालको भनाइ छ । महाधिवेशनको स्वास्थ्य समितिसँगै एम्बुलेन्स रहने ढकालले बताए । एमालेको महाधिवेशनका लागि प्रयोग हुने एम्बुलेन्ससँगै नेपाल रेडक्रस सोसाइटीको प्राथमिक उपचारको तालिम लिएका स्वयंसेवकहरू परिचालन हुने बताइएको छ ।
प्रादेशिक रक्तसञ्चार केन्द्र भरतपुरका प्रमुख रमेशकान्त पौडेलले महाधिवेशन उद्घाटन हुने स्थानमा भिआईपी र भिभिआईपीलाई लक्षित गर्दै दुई वटा एम्बुलेन्स तयारी अवस्थामा राखिने बताए । मञ्चको आडैमा ‘क’ वर्गको एउटा र ‘ख’ वर्गको एउटा गरी दुई वटा एम्बुलेन्स तयारी अवस्थामा राखिने छ । “मञ्चमा हुने विशिष्ट व्यक्तिहरूका लागि लक्षित गर्दै स्वास्थ्य तथा वातावरण सरोकार समाज सौराहाको क वर्गको र रेडक्रस सोसाइटी जिल्ला शाखा चितवनको ख वर्गको एम्बुलेन्स मञ्चलाई लक्षित गर्दै राख्छौँ” पौडेलले भने, “उद्घाटन सत्र सकिएपछि भने बन्दसत्र हुने स्थान सौराहामा केन्द्रित गरेर एम्बुलेन्स परिचालन गरिनेछ ।”
बन्दसत्र अवधिभर सौराहामा एमाले पार्टी अध्यक्ष केपी शर्मा ओली बस्ने ठाउँमा क वर्गको परिचालन हुने भन्दै पौडेलले थप चार वटा एम्बुलेन्स बन्दसत्र हुने स्थानको नजिकमा रहने बताए । “महाधिवेशन प्रतिनिधिहरू बिरामी परेको अवस्थामा उनीहरू बसेकै होटलमा पुगेर थप उपचारका लागि स्वास्थ्य संस्थामा पुर्याउने गरी सौराहामा एम्बुलेन्स पार्किङ गरेर राख्नेछौँ” पौडेलले भने, “सम्भावित दुर्घटनालाई मध्यनजर गरी मानवीय सेवामा समर्पित भएर महाधिवेशन अवधिभर निःशुल्क रूपमा एम्बुलेन्स सञ्चालन गर्दैछौँ ।”
बन्दसत्र अवधिमा बिरामी भएका प्रतिनिधिहरूलाई चितवनको मेडिकल कलेजमा निःशुल्क उपचार गरिने गरी सहमति गरिएको समितिका सदस्य डा कृष्णप्रसाद अधिकारीले बताए । “महाधिवेशनमा सबै विषयका विज्ञ चिकित्सक सहित २५० जना स्वास्थ्यकर्मीको टोली आवश्यक औषधिसहित परिचालन हुन्छ” अधिकारीले भने, “हामीले उपचार गर्न नसकेको बिरामीलाई भरतपुरको मेडिकल कलेजमा निःशुल्क उपचार गर्ने गरी सहमति भएको छ ।” बन्दसत्र हल नजिकै स्वास्थ्य समितिले चिकित्सक सहितको टोली राख्नेछ ।
