ट्रम्प–सीबीचको लञ्चमा ‘कुङ पाओ चिकेन’ देखि ब्राउनीसम्म

बेइजिङ । अमेरिकी राष्ट्रपति डोनाल्ड ट्रम्प यतिबेला चीनमा छन् । चीनको दुई दिने राजकीय भ्रमणमा पुगेका ट्रम्प र सीबीच यतिबेला गहन वार्ता भइरहेको छ । दुवै देशका सीमित उच्च अधिकारीहरूको उपस्थितिमा दुई नेताले व्यापार, सुरक्षा र द्विपक्षीय सम्बन्धका संवेदनशील विषयमा छलफल गरेका थिए । 

यस क्रममा दुबैले एक साथ लन्च पनि गरेका थिए । ह्वाइट हाउसका अनुसार लन्चको मेनु ट्रम्पको खानपान रुचिलाई ध्यानमा राखेर तयार गरिएको थियो । यसमा समुद्री खाना, मासु, तरकारी तथा चिनियाँ परम्परागत परिकारहरूको मिश्रण समावेश थियो । 

यसमा अन्य परिकारहरूमा चिनियाँ लोकप्रिय डिश कुङ पाओ चिकन विशेष आकर्षणका रूपमा रहेको थियो । यससँगै मौसमी हरियो सागसब्जी, बाँसका टुसा, च्याउ, स्टीम्ड पोर्क तथा झिंगे माछाको डम्प्लिङ पनि मेनुमा थिए । डेजर्टमा भने चकलेट ब्राउनी, ताजा फलफूल, आइसक्रिम, कफी र चिया राखिएको थियो ।