युक्रेनी डोनले तेल ट्याङ्कमा लागेपछि लाटभियाका रक्षामन्त्रीले दिए राजीनामा

रिगा । लाट्भियाका रक्षा मन्त्री एन्ड्रिस स्प्रड्सले आइतबार राजीनामा दिएका छन् । रुसतर्फबाट प्रवेश गरेका दुई युक्रेनी ड्रोनले तेल भण्डारण केन्द्रमा लागेपछि उनको राजीनामा आएको हो ।

 लाट्भियाकी प्रधानमन्त्री एभिका सिलिनाले आइतबार बिहानै स्प्रुड्सको राजीनामा माग गरेकी थिइन् । उनले ड्रोनविरुद्धको सुरक्षा प्रणाली समयमै परिचालन गर्न नसकिएको भन्दै असन्तुष्टि जनाइन् । 

युक्रेनका विदेश मन्त्री एन्ड्री सिबिहाले आइतबार माइक्रो ब्लगिङ वेबसाइट एक्समा पोष्टमार्फत ती ड्रोन युक्रेनी भएको पुष्टि गरेका छन् । उनका अनुसार रूसले सञ्चालन गरेको इलेक्ट्रोनिक युद्ध प्रणालीका कारण ड्रोनहरू आफ्नो लक्ष्यबाट विचलित भएर लाट्भियातर्फ पुगे । यस घटनापछि युक्रेनले बाल्टिक राष्ट्रहरूको हवाई सुरक्षा सुदृढ बनाउन विशेषज्ञ टोली पठाउने सम्भावना विचार गरिरहेको सिबिहाले बताए ।