क्रुज जहाजबाट फर्किएका फ्रान्सेली नागरिकमा देखियो हन्टाभाइरसका लक्षण
पेरिस । हन्टाभाइरसको प्रकोप देखिएको क्रुज जहाजबाट फर्काइँदै गरेका एक फ्रान्सेली यात्रुमा सङ्क्रमणको लक्षण देखिएको फ्रान्सका प्रधानमन्त्री सेबास्टियन लेकोर्नुुले बताएका छन् ।
प्रधानमन्त्रीका अनुसार टेनेरिफबाट पेरिसतर्फ ल्याइँदै गरिएको चार्टर्ड उडानमा ती यात्रुमा लक्षण देखिएपछि एमभी होन्डिउस जहाजबाट उद्धार गरिएका पाँचै जना फ्रान्सेली नागरिकलाई अर्काे सूचना नभएसम्म कडा आइसोलेसनमा राखिएको छ । जहाज आइतबार बिहान क्यानरी टापुनजिक रोकिएको थियो ।
फ्रान्सेली उडान पेरिसको ले बोर्जेट विमानस्थल विमानस्थलमा अवतरण गरेपछि व्यक्तिगत सुरक्षा सामग्री (पीपीई) लगाएका स्वास्थ्य अधिकारीहरूले यात्रुहरूलाई स्वागत गरेका थिए । त्यसपछि एम्बुलेन्समार्फत उनीहरूलाई अस्पताल लगिएको थियो । फ्रान्सको विदेश मन्त्रालयका अनुसार उनीहरूलाई ७२ घण्टा क्वारेन्टिनमा राखेर विस्तृत स्वास्थ्य परीक्षण गरिनेछ । त्यसपछि ४५ दिनसम्म घरमै सेल्फ–आइसोलेसनमा बस्नुपर्नेछ ।
स्पेन फर्काइएका १४ जना स्पेनी नागरिकलाई म्याड्रिडस्थित सैनिक अस्पतालमा अनिवार्य क्वारेन्टिनमा राखिएको छ । बेलायतका नागरिकहरूलाई म्यानचेस्टर ल्याइएको छ । हालसम्म कुनै पनि बेलायती यात्रुमा लक्षण नदेखिए पनि बेलायतको स्वास्थ्य सुरक्षा एजेन्सीले उनीहरूको निगरानी गरिरहेको जनाएको छ । नेदरल्यान्ड्समा २६ यात्रु तथा चालक दलका सदस्य पुगेका छन्, जसमा आठ डच नागरिक छन् ।
अमेरिकातर्फ गएको उद्धार उडानमा १८ जना थिए । अमेरिकी स्वास्थ्य अधिकारीहरूका अनुसार एक यात्रुमा हल्का लक्षण देखिएको छ भने अर्का एकजनामा हन्टाभाइरसको एंडीज स्ट्रेन पोजिटिभ देखिएको छ । सावधानीका रूपमा उनीहरूलाई “बायोकन्टेनमेन्ट युनिट” मा राखेर यात्रा गराइएको थियो । टर्की र आयरल्यान्डका नागरिकलाई पनि फर्काउने उडान तय गरिएको छ । बाँकी दुई उद्धार उडान सोमबार प्रस्थान गर्ने बताइएको छ ।
