जर्मनीबाट अमेरिकी सैनिक फिर्ता गर्ने ट्रम्पको चेतावनी, युरोपसँगको सम्बन्धमा दरार
वासिङ्टन डिसी । अमेरिकी रक्षा मन्त्रालयले जर्मनीबाट करिब पाँच हजार अमेरिकी सैनिक फिर्ता गर्ने योजना बनाएको छ, जसले अमेरिका र युरोपबीचको सम्बन्धमा नयाँ तनावको सङ्केत गरेको छ।
शुक्रबार सार्वजनिक विवरणअनुसार एक वरिष्ठ रक्षा अधिकारीले यो योजना हाल विचाराधीन अवस्थामा रहेको बताएका छन्। जर्मनीका चान्सलर फ्रिडरिख मर्जले हालै इरानसँग सम्बन्धित अमेरिकी सैन्य गतिविधिबारे गरेको टिप्पणीलाई ‘अनुचित र सहयोगी नभएको’ भन्दै अमेरिकी पक्ष असन्तुष्ट देखिएको छ।
यसको प्रतिक्रिया स्वरूप अमेरिकी राष्ट्रपति डोनाल्ड ट्रम्पले जर्मन नेतृत्वमाथि कडा टिप्पणी गर्दै मर्जले के बोलिरहेका छन् भन्ने उनैलाई थाहा नभएको बताएका छन्। साथै उनले इरानको आणविक महत्वाकांक्षाप्रति जर्मनी गम्भीर नभएको आरोप पनि लगाएका छन्।
ट्रम्पले सामाजिक सञ्जालमार्फत जर्मनीमा रहेका अमेरिकी सैनिक सङ्ख्या घटाउने सम्भावना रहेको सङ्केत दिँदै यसबारे छोटो समयमै निर्णय हुने बताएका छन्। उनले स्पेन र इटालीमा पनि अमेरिकी सैनिक उपस्थिति घटाउन सकिने उल्लेख गरे। युरोपेली सहयोगी देशहरूले अमेरिका, इजरायल र इरानबीचको द्वन्द्वमा पर्याप्त सहयोग नगरेको भन्दै उनले ती देशहरूको आलोचना गरेका छन्।
जर्मनीका विदेशमन्त्री जोहान वाडेफुलले सम्भावित सैनिक कटौतीका लागि आफ्नो देश तयार रहेको र यसलाई परिस्थितिअनुसार सामना गरिने बताएका छन्। हालको तथ्याङ्कअनुसार गत वर्षको अन्त्यसम्म जर्मनीमा ३६ हजारभन्दा बढी अमेरिकी सक्रिय सैनिक तैनाथ छन्।
यसबाहेक करिब एक हजार ५०० आरक्षित सैनिक र ११ हजार ५०० नागरिक कर्मचारी पनि त्यहाँ कार्यरत छन्। जर्मनीमा अमेरिकी युरोप कमाण्ड र अफ्रिका कमाण्डको मुख्यालय रहनुका साथै रामस्टाइन हवाई अड्डा अमेरिकी सैन्य सञ्चालनका लागि महत्त्वपूर्ण केन्द्रका रूपमा परिचित छ।
