ट्रम्पको टिप्पणीले भारत आक्रोशित

नयाँ दिल्ली । अमेरिकी राष्ट्रपति डोनाल्ड ट्रम्पले सामाजिक सञ्जाल ‘ट्रुथ सोसल’ मा भारत र भारतीयबारे विवादास्पद टिप्पणी साझा गरेपछि नयाँ दिल्लीले त्यसको आलोचना गरेको छ। ट्रम्पले पोडकास्टर माइकल सेभेजको एक कुराकानीको ट्रान्सक्रिप्ट साझा गरेका थिए, जसमा भारत र चीनका मानिसहरूले अमेरिकाको ‘जन्मसिद्ध नागरिकताको अधिकारको दुरुपयोग गरिरहेको आरोप लगाइएको छ। उक्त सामग्रीमा भारतलाई नर्क जस्तो ठाउँको संज्ञा दिइएको छ।

भारतको विदेश मन्त्रालयले ट्रम्प वा सेभेजको नाम नलिई उक्त टिप्पणीहरूलाई ‘तथ्यहीन, अनुपयुक्त र तल्लो स्तरको’ भन्दै आपत्ति जनाएको छ। मन्त्रालयले जारी गरेको विज्ञप्तिमा यस्ता टिप्पणीहरूले भारत र अमेरिकाबिचको आपसी सम्मान र साझा हितमा आधारित वास्तविक सम्बन्धलाई प्रतिबिम्बित नगर्ने स्पष्ट पारेको छ।

ट्रम्प प्रशासन र भारतबिचको सम्बन्ध पछिल्लो समय केही उतारचढावपूर्ण देखिएको छ। ट्रम्पले रुसी तेल खरिद रोक्न भारतमाथि दबाब दिँदै आएका छन् भने गत वर्ष भारतीय सामानमा ५० प्रतिशतसम्म भन्सार शुल्क लगाएका थिए। यद्यपि, फेब्रुअरीमा एक व्यापार सम्झौताको क्रममा उक्त शुल्क घटाएर १८ प्रतिशतमा झारिएको थियो। अर्को महिना अमेरिकी विदेश मन्त्री मार्को रुबियोले गर्ने भनिएको भारत भ्रमणलाई सम्बन्ध सुधारको प्रयासका रूपमा हेरिएको थियो, तर ट्रम्पको पछिल्लो कदमले कूटनीतिक वातावरण पुनः बिथोलेको छ।

ट्रम्पले साझा गरेको सामग्रीमा अमेरिकी श्रम बजारमा भारतीयहरूको वर्चस्व रहेको भन्दै नकारात्मक टिप्पणी गरिएको छ। पोडकास्टर सेभेजले क्यालिफोर्नियाका उच्च प्राविधिक कम्पनीहरूमा श्वेत मानिसहरूले जागिर नपाउने र त्यहाँका आन्तरिक संयन्त्रहरू भारतीय र चिनियाँहरूले चलाएको दाबी गरेका छन्।

ट्रम्पले दक्ष कामदार भित्र्याउने एच-वान बी भिसा कार्यक्रम र अमेरिकामा जन्मने बित्तिकै पाइने नागरिकताको अधिकार अन्त्य गर्न खोजिरहेका बेला यस्ता टिप्पणीहरू बाहिर आएका हुन्। अमेरिकाको सर्वोच्च अदालतमा अहिले जन्मसिद्ध नागरिकता सम्बन्धी कार्यकारी आदेशमाथि बहस भइरहेको छ।