ट्रम्पले युद्धविराम लम्ब्याएपछि इरानद्वारा दुई जहाजमाथि आक्रमण
काठमाडौँ । इरानले स्टेट अफ होर्मुजमा दुई वटा जहाजमाथि आक्रमण गरेको छ । बेलायतको समुद्री व्यापार हेर्ने संस्था यूकेएमटीओका अनुसार बुधबार बिहान स्ट्रेट अफ होर्मुज क्षेत्रमा दोस्रो जहाजमाथि पनि गोली प्रहार भएको छ। यूकेएमटीओले जनाएअनुसार इरानबाट बाहिरिँदै गरेको एक कार्गाे जहाजमाथि इरानबाट करिब ८ नटिकल माइल पश्चिममा भएको बेलामा गोली प्रहार गरिएको थियो ।
जहाजको नाम यूफोरिया भएको अनि यो पनामामा दर्ता छ । जहाज संयुक्त अरब इमिरेट्मा आधारित कम्पनीको स्वामित्वमा रहेको छ । केप्लरको एआईएस डेटाअनुसार यो जहाज २२ अप्रिलमा स्ट्रेट हुँदै साउदी अरबको जेद्दाहतर्फ जाँदै थियो।
यसअघि बिहानै अर्काे घटनामा इस्लामिक रिभोलुशनरी गार्ड कप्र्स (आईआरजीसी)को “गन बोट” ले एउटा कन्टेनर जहाजमाथि आक्रमण गरेको थियो । बीबीसी भेरिफाईका अनुसार उक्त जहाजको नाम “इपामिनोन्डास” हो र यो ग्रीक कम्पनीको स्वामित्वमा रहेको छ। जहाजले स्ट्रेट पार गर्ने अनुमति पाएको भनिए पनि आईआरजीसीको बोटले नजिकिँदै गोली प्रहार गर्दा जहाजको ब्रिजमा गम्भीर क्षति पुगेको थियो।
