युक्रेनमा रुसी आक्रमण जारी, ओडेसामा मानवीय क्षति बढ्दै

किभ । रुसले युक्रेनको दक्षिणी क्षेत्र ओडेसामा गरेको रातभरको ड्रोन आक्रमणमा आवासीय भवनमा आगलागी हुँदा एक महिलाको मृत्यु भएको छ । ओडेसा क्षेत्रका गभर्नर ओलेह किपरले शनिबार बिहान सामाजिक सञ्जालमार्फत उक्त जानकारी दिएका हुन् ।

यसैबिच, उत्तर–पूर्वतर्फ पर्ने जापोरिझ्झिया क्षेत्रमा पछिल्लो २४ घण्टामा भएका आक्रमणमा कम्तीमा एक जनाको मृत्यु हुनुका साथै तीन जना घाइते भएका छन् । क्षेत्रीय सैन्य प्रमुख इभान फेदोरोभका अनुसार उक्त अवधिमा ४१ बस्तीमा ६५५ वटा आक्रमण गरिएको छ ।

यी घातक आक्रमणहरू जर्मनीको म्युनिखमा आयोजित उच्चस्तरीय सम्मेलनको समयमा भएका हुन्, जहाँ अमेरिका र युरोपेली नेता, कूटनीतिज्ञ तथा रक्षा अधिकारीहरू युक्रेन युद्ध अन्त्यका उपायबारे छलफल गरिरहेका छन् ।

जर्मन सरकारी स्रोतका अनुसार चान्सलर फ्रिडरिख मर्ज र अमेरिकी विदेशमन्त्री मार्को रुबियोबीच युक्रेनको अवस्था, रुससँगको वार्ताको स्थिति तथा विशेषगरी सैन्य सहयोगका विषयमा छलफल भएको छ ।

युक्रेनका राष्ट्रपति भोलोदिमिर जेलेन्स्की पनि म्युनिखमा विभिन्न सहयोगी राष्ट्रका नेताहरूसँग भेटघाटमा संलग्न रहेका छन् र शनिबार सम्मेलनलाई सम्बोधन गर्ने अपेक्षा गरिएको छ । सम्मेलनमा कुनै पनि रुसी अधिकारीलाई आमन्त्रण गरिएको छैन ।