महिला क्रिकेटकाे स्वर्णका लागि पुलिस र एपीएफ खेल्दै

पोखरा । नवौँ राष्ट्रिय खेलकुदअन्तर्गत महिला क्रिकेटको उपाधिका लागि आज दुई विभागीय टिम नेपाल पुलिस क्लब र एपीएफ क्लबबीच प्रतिस्पर्धा हुँदैछ । 

पोखरा रंगशालामा स्वर्णका लागि एपीएफ र पुलिसबीचको खेल दिउँसो १ः१५ बजे सुरु हुनेछ । राष्ट्रिय खेलकुदमा पुलिसको महिला क्रिकेट टिमले पहिलो पटक सहभागिता जनाएको हो । यसअघिसम्म पुलिसको महिला क्रिकेट टिम नै थिएन । यता, एपीएफले भने राष्ट्रिय खेलकुद निरन्तर खेल्दै आएको छ । पुलिस आफ्नो डेब्यु प्रतियोगितामै स्वर्ण जित्ने लक्ष्यमा छ । 

सोमबार भएको सेमिफाइनलमा एपीएफले लुम्बिनी र नेपाल पुलिस क्लबले बागमती प्रदेशलाई पराजित गर्दै फाइनलमा प्रवेश गरेका थिए । पहिलो सेमिफाइनलमा एपीएफले लुम्बिनी प्रदेशलाई ६७ रनले पराजित गरेको थियो । १३० रनको लक्ष्य पछ्याउने क्रममा लुम्बिनी प्रदेशले १८.२ ओभरमा ६२ रन मात्रै बनाएपछि एपीएफले फराकिलो जित निकालेको थियो । लुम्बिनीका कुनै पनि ब्याटरले राम्रो प्रदर्शन गर्न सकेनन् । लुम्बिनीलाई सस्तैमा रोक्ने क्रममा एपीएफकी नेरी थापाले चार विकेट लिइन् ।

पहिलो ब्याटिङ गरेको एपीएफले निर्धारित २० ओभरमा तीन विकेटको क्षतिमा १२९ रन बनाएको थियो । एपीएफका लागि ओपनर ज्योति पाण्डेले ६९ रन बनाइन् । त्यस्तै, ममता चौधरीले १६ र कप्तान सीता रानामगरले ११ बनाए । लुम्बिनीका कृतिका मरासिनीले दुई र मनिषा रानाले एक विकेट लिए ।

त्यस्तै फाइनल पुग्ने क्रममा पुलिसले बागमती प्रदेशलाई ३६ रनले पराजित गरेको थियो । पुलिसले निर्धारित २० ओभरमा चार विकेट गुमाएर १२३ रन बनाएको थियो । पुलिसका काजल श्रेष्ठको ४६ तथा कविता कुँवरको २६ रन बनाए । १२४ रनको लक्ष्य पछ्याउँदै ब्याटिङ गरेको बागमतीले निर्धारित २० ओभरमा आठ विकेटको क्षतिमा ८७ रन मात्रै बनाउन सक्यो । बागमतीका सुमन खतिवडाले २३ तथा अस्मिना कर्मचार्यले १८ रन बनाए ।