आणविक कार्यक्रममा कुनै नयाँ कदम स्वीकार गरिएको छैन : इरान

तेहरान । इरानले अमेरिकासँगको युद्ध अन्त्य गर्न भइरहेको वार्ताका क्रममा आफ्नो आणविक कार्यक्रमसम्बन्धी कुनै नयाँ कदम स्वीकार नगरेको जनाएको छ । इरानको सरकारी समाचार संस्था तस्निम न्यूज एजेन्सीले आइतबार दिएको जानकारीअनुसार इरानले आणविक कार्यक्रमसम्बन्धी कुनै नयाँ कदम स्वीकार नगरेको हो । 

तस्निमले माइक्रो ब्लगिङ वेबसाइट एक्समा लेखेको छ, ‘इरानले हालको अवस्थामा आणविक क्षेत्रमा कुनै पनि कार्य स्वीकार गरेको छैन ।’ 

तस्निमले टेलिग्राममा छुट्टै रिपोर्ट प्रकाशित गर्दै होर्मुज नाका युद्धपूर्वको अवस्थामा नफर्किने जनाएको थियो । स्ट्रेटमाथि इरानले आफ्नो सार्वभौमिक अधिकार विभिन्न माध्यमबाट प्रयोग गरिरहने अडान कायम राखेको छ । 

यसको विस्तृत योजना पछि सार्वजनिक गरिने बताइएको छ । रिपोर्टमा भनिएको छ, ‘समझदारी अनुसार ३० दिनभित्र समुद्री नाकाबन्दी पूर्ण रूपमा हटाउनु पर्छ ।’ अमेरिकी नौसैनिक नाकाबन्दी हटाइएन भने स्ट्रेट अफ होर्मुजमा कुनै परिवर्तन नगर्ने चेतावनी पनि इरानले दिएको छ । 

तस्निमका अनुसार सम्भावित कुनै पनि प्रारम्भिक सम्झौताअन्तर्गत विदेशमा रोक्का गरिएका इरानी सम्पत्तिको केही हिस्सा पहिलो चरणमै फुकुवा गरिनुपर्ने माग पनि तेहरानले राखेको छ । 

विगतमा सम्झौता उल्लङ्घन भएको अनुभवलाई उल्लेख गर्दै इरानले यस पटक वास्तविक रूपमा प्रयोग गर्न सकिने गरी सम्पत्ति फिर्ता हुनुपर्ने सर्त अघि सारेको बताइएको छ ।