ट्रम्पको चीन भ्रमणबारे पुटिन र सी जिनपिङबिच छलफल हुने
मस्को । रुसी राष्ट्रपति भ्लादिमिर पुटिनले अमेरिकी राष्ट्रपति डोनाल्ड ट्रम्पको भर्खरैको चीन भ्रमणबारे चिनियाँ नेता सी जिनपिङसँग प्रत्यक्ष छलफल गर्ने आशा राखेको क्रेमलिनले शुक्रबार जनाएको छ ।
क्रेमलिनका प्रवक्ता डिमिट्री पेस्कोभले पत्रकारहरूसँग कुरा गर्दै पुटिनको आगामी बेइजिङ भ्रमण चिनियाँ र अमेरिकी पक्षबिच भएका सम्पर्कहरूबारे विचार आदान प्रदान गर्ने राम्रो अवसर हुने बताएका हुन् । पुटिनको चीन भ्रमणको मिति अहिलेसम्म घोषणा भने गरिएको छैन ।
चीन अहिले रुसको सबैभन्दा महत्त्वपूर्ण साझेदार मानिन्छ । चिनियाँ कम्पनीहरूले उत्पादन गर्ने इलेक्ट्रोनिक कम्पोनेन्टहरू रुसी रक्षा उद्योगका लागि अत्यावश्यक रहेका छन् ।
साथै, रुसी तेलको सबैभन्दा ठुलो खरिदकर्ता पनि चीन नै भएकाले, युक्रेन युद्धका कारण दबाबमा परेको रुसी अर्थतन्त्रका लागि चीन आम्दानीको प्रमुख स्रोत बनेको छ ।
