बोइङ ७३७ म्याक्स दुर्घटनामा ज्यान गुमाएकी युवतीको परिवारलाई ४ करोड ९५ लाख डलर क्षतिपूर्ति
सिकागो । अमेरिकाको शिकागोस्थित अदालतको एक जूरीले घरेलु विविमान निर्माता कम्पनी बोइङविरुद्ध फैसला सुनाउँदै २०१९ मा भएको इथोपियन एयरलाइन्सको फ्लाइट ३०२ दुर्घटनामा ज्यान गुमाएकी एक महिलाको परिवारलाई ४ करोड ९५ लाख अमेरिकी डलर क्षतिपूर्ति दिन आदेश दिएको छ ।
जूरीले बुधबार राति मृतक साम्या स्टुमोको परिवारलाई विभिन्न शीर्षकमा रकम प्रदान गरेको हो । अदालतले साम्याले दुर्घटनाको क्रममा भोगेको पीडाबापत २ करोड १० लाख डलर, परिवारले गुमाएको साथ–सहयोगका लागि १ करोड ६५ लाख डलर तथा परिवारको शोक र पीडाका लागि १ करोड २० लाख डलर दिने निर्णय गरेको छ ।
२४ वर्षीया साम्या स्टुमो गैरनाफामूलक संस्था थिंकवेलमा कार्यरत थिइन् । उनी इथियोपियाबाट केन्याको नैरोबी जाँदै गरेको उडानमा यात्रुका रूपमा सवार थिइन् । बोइङले दुर्घटनाप्रति आफ्नो जिम्मेवारी अस्वीकार नगरे पनि कम्पनीका उच्च अधिकारी र विमानका पार्टपुर्जा निर्माता विरुद्ध दायर दण्डात्मक क्षतिपूर्ति माग भने अदालतले खारेज गरेको थियो ।
अहिले स्टुमो परिवारका वकिलहरूले पुनः त्यस्ता दाबी बहाल गराउन पुनरावेदन अदालतको ढोका ढकढक्याइरहेका छन् । बोइङले यी दुई दुर्घटनासम्बन्धी अधिकांश देवानी मुद्दाहरू समाधान गरिसकेको छ । कम्पनीले क्षतिपूर्ति, गैर–अभियोग सम्झौता तथा अन्य भुक्तानीमार्फत अर्बौँ डलर खर्च गरिसकेको बताइएको छ ।
