काबुलमा विद्यालय खोल्न अपिल

काठमाडाैँ । अफगानिस्तानको राजधानी काबुलमा महिला विद्यार्थीहरूले इस्लामिक इमिरेट्सको प्रतिबन्ध अन्तर्गत बन्द रहेका विद्यालय र शैक्षिक संस्थाहरू पुनः खोल्नका लागि अपिल गरेका छन् । उनीहरुले अधिकारीहरूलाई बालिकाहरुलाई आफ्नो शिक्षा पुनः सुरु गर्न अनुमति दिन आग्रह गर्दै विद्यालय तथा शैक्षिक संस्थाहरु खोल्न र शिक्षाको अवसर दिन अनुरोध गरेका हुन्।

महिला अधिकारकर्मीहरूले पनि यो परिस्थितिलाई मौलिक अधिकारको उल्लङ्घनको रूपमा वर्णन गर्दै अफगान जनताको हितको लागि विद्यालय र विश्वविद्यालयका ढोका सकेसम्म चाँडो खोल्नुपर्ने बताएका छन्।

अफगानिस्तानमा राजनीतिक परिवर्तन पछि बालिकाहरूको शिक्षामा व्यापक प्रतिबन्ध लगाइएको थियो, जसका कारण धेरैका लागि विद्यालय र विश्वविद्यालयहरूको ढोका बन्द रह्यो ।

अन्तर्राष्ट्रिय मानव अधिकार सङ्गठनहरूले बारम्बार शिक्षामा पहुँच मौलिक मानव अधिकारको विषय भएको विषयमा जोड दिँदै बालिकाहरुलाई यस अधिकारबाट बञ्चित गर्नाले अफगान समाजमा दीर्घकालीन रुपमा प्रतिकूल प्रभाव पार्न सक्ने चेतावनी दिएको छ।