लिग-२ मा नेपाल र अमेरिकाले खेले बराबरी

काठमाडौं, जेठ २९ । आईसीसी पुरुष क्रिकेट विश्वकप लिग-२ मा नेपाल र अमेरिका बीचको खेल बराबरीमा टुंगिएको छ । गएराति अमेरिकामा भएको खेलमा नेपालले दिएको २७५ रनको लक्ष्य पछ्याउने क्रममा अमेरिकाले ६ विकेटको क्षतिमा २७४ रन बनाएको हो।

अमेरिकाका लागि स्टेभन टेलरले शतक प्रहार गरे। उनले १२३ बलमा ११ चौका र तीन छक्का प्रहार गरे । त्यस्तै, मोनांक पटेलले ८५, आरोन जोन्सले २६, सुशान्त मोदानीले १७ र राहुल जरिवालाले १० रन बनाए।

नेपालका लागि मोहम्मद आदिल आलमले तीन, सोमपाल कामी र सन्दीप लामिछानेले एक-एक विकेट लिए। यसअघि टस जितेर ब्याटिङ गरेको नेपालले ४९.२ ओभरमा सबै विकेट गुमाएर २७४ रन बनाएको थियो। नेपालका लागि रोहित पौडेल, आसिफ शेख र देव खनालले अर्थ शतक प्रहार गरे। पौडेलले ६२, शेखले ६१ र खनालले ५४ रन बनाए। त्यस्तै, मोहम्मद आदिल आलमले ३६, कुशल भुर्तेलले १९ र सन्दीप लामिछानेले १० रन बनाए।

देव खनाल प्लेयर अफ द म्याच भए। उनले २४ बलमा ३६ प्रहार गरेका थिए भने ९ ओभरमा ४५ रन खर्चेर तीन विकेट लिएका थिए। यो खेलमा नेपाल र अमेरिकाले एक-एक अंक बाँडेका छन्। योसँगै नेपालको १३ अंक भएको छ भने अमेरिकाको २१ अंक भएको छ।

अमेरिका भ्रमणका क्रममा नेपालले अर्को खेल मंगलबार ओमनसँग तेस्रो खेल खेल्नेछ।