सीसँग ट्रम्पले ताइवान हतियार बिक्री र जिम्मी लाईको मुद्दाबारे छलफल गर्ने
वाशिङटन डीसी । अमेरिकी राष्ट्रपति डोनाल्ड ट्रम्प यही साता चीन भ्रमणमा जाँदै छन् । यस भ्रमणका क्रममा उनले चिनियाँ समकक्षी सि जिनपिङसँग ताइवानलाई अमेरिकी हतियार बिक्री तथा जेलमा रहेका हङकङेली सञ्चार व्यवसायी जिम्मी लाईको विषयमा छलफल गर्ने बताएका छन् ।
ह्वाइट हाउसमा पत्रकारहरूसँग कुरा गर्दै ट्रम्पले ताइवानको रक्षा समर्थनबारे प्रश्न उठ्दा “राष्ट्रपति सीसँग म त्यसबारे छलफल गर्नेछु” भने । अमेरिकाले ताइवानलाई हतियार बिक्री नगरोस् भन्ने चीनले चाहेको उल्लेख गर्दै यो आफूले उठाउने धेरै विषयमध्ये एक हुने बताए ।
ताइवानलाई अमेरिकी हतियार बिक्री लामो समयदेखि अमेरिका–चीन सम्बन्धमा तनावको मुख्य कारण बन्दै आएको छ । गत डिसेम्बरमा ट्रम्प प्रशासनले ताइवानका लागि ११ अर्ब डलरभन्दा बढीको सबैभन्दा ठुलो अमेरिकी हतियार प्याकेज घोषणा गरेको थियो ।
हालैका दिनमा ट्रम्पका सहयोगीहरूले ताइवानलाई आफ्नो रक्षा खर्च अझ बढाउन आग्रह गरेका छन् । यद्यपि एक अमेरिकी अधिकारीका अनुसार ट्रम्प–सी शिखर बैठकले ताइवानसम्बन्धी अमेरिकी नीतिमा कुनै परिवर्तनको संकेत गरेको छैन ।
पत्रकारहरूसँग कुरा गर्दै ट्रम्पले आफ्नो कार्यकालमा ताइवानलाई लिएर सैन्य तनाव बढ्ने सम्भावना कम रहेको पनि बताए । “मलाई लाग्दैन त्यस्तो हुन्छ,” उनले भने, “हामी ठिक उनेछौँ । मेरो राष्ट्रपति सीसँग निकै राम्रो सम्बन्ध छ । उहाँलाई थाहा छ कि त्यस्तो होस् भन्ने म चाहन्नँ ।”
