दलित पक्षमा उभिँदा कुटपिट र धम्की, विजय यादवद्वारा प्रशासनलाई प्रश्न

वैशाख २३ गते , काठमाडौँ । रौतहट जिल्लाको फतुवा विजयपुर नगरपालिकाका वडा नं ५ सन्तपुर (दो) गाउँमा केही दिन अघि भएको जातीय विभेदसम्बन्धी घटनाले नयाँ मोड लिएको छ। दलित समुदायलाई सहयोग गरेको कारण आफ्नै परिवारमाथि पटक–पटक आक्रमण भइरहेको भन्दै मेयर प्रत्यासी विजय यादव निर्विजले सामाजिक सञ्जाल फेसबुकमार्फत गम्भीर आरोप सार्वजनिक गरेका छन्।

विजय यादवले आफ्नो फेसबुक स्टाटसमा उल्लेख गर्दै राजकुमार राम लगायतका दलित परिवारमाथि सामूहिक आक्रमणमा संलग्न भनिएका व्यक्तिहरूले अहिले आफ्नो परिवारलाई लक्षित गर्दै हमला गरिरहेको बताएका छन्। उनका अनुसार भुनेश्वर यादव र नितेश यादव सहित चार जनाको समूहले उनका काँछो भाई जयकिशोर यादवमाथि कुटपिट गरी घाइते बनाएको छ। जयकिशोर शारीरिक रूपमा कमजोर रहेको उल्लेख गरिएको छ।

उक्त घटनामा संलग्न व्यक्तिहरूमाथि ज्यान मार्ने उद्योगसम्बन्धी मुद्दा दर्ता भइसकेको भए पनि निरन्तर धम्की र आक्रमण जारी रहेको उनले बताएका छन्। “दलित समुदायको पक्षमा उभिँदा हाम्रो परिवारमाथि नै हमला हुनु अत्यन्त दुःखद र चिन्ताजनक विषय हो,” उनले फेसबुकमार्फत लेखेका छन्।

विजय यादवले राज्य र सुरक्षा निकायप्रति असन्तुष्टि जनाउँदै यस्तो संवेदनशील विषयमा समेत प्रभावकारी कदम नचालिएको आरोप लगाएका छन्। उनले भनेका छन्, “एकातिर सरकारले दलित समुदायसँग माफी माग्ने कुरा गर्छ, अर्कोतिर उनीहरूलाई सहयोग गर्ने व्यक्तिमाथि नै हमला हुँदा पनि प्रशासन मौन बस्नु दुःखद हो।”

नेपालको कानुनले जातीय विभेदलाई स्पष्ट रूपमा दण्डनीय अपराध मानेको स्मरण गराउँदै उनले दोषीलाई तत्काल पक्राउ गरी कडा कारबाही गर्न माग गरेका छन्। साथै, पीडित परिवारको सुरक्षा सुनिश्चित गर्न पनि उनले जोड दिएका छन्।

यो घटनालाई केवल व्यक्तिगत विवाद नभई सामाजिक विभेद र अन्यायको ज्वलन्त उदाहरणको रूपमा उल्लेख गर्दै विजय यादवले समानता, न्याय र मानव अधिकारको पक्षमा सबैलाई एकजुट हुन आह्वान गरेका छन्। उनले डर र धम्कीका बीच पनि सत्य र न्यायका लागि संघर्ष जारी राख्ने प्रतिबद्धता समेत व्यक्त गरेका छन्।