अध्यक्ष पदबाट बाहिरिँदै नेटफ्लिक्सका सह-संस्थापक रीड हेस्टिङ्स

वासिङ्टन डीसी । स्ट्रिमिङ कम्पनी नेटफ्लिक्सका सह–संस्थापक तथा अध्यक्ष रीड हेस्टिङ्सले कम्पनी छोड्ने घोषणा गरेका छन् । उनले २९ वर्षअघि स्थापना गरेको कम्पनीबाट जुनमा हुने वार्षिक बैठकपछि औपचारिक रूपमा बाहिरिने योजना बनाएका हुन् ।

नेटफ्लिक्सले वार्नर ब्रोज डिस्कभरीसँगको करिब ७२ अर्ब डलरको ठुलो सम्झौता गुमाएपछि यो घोषणा आएको हो । वार्नर ब्रोज डिस्कभरी प्यारामाउन्ट स्काईडान्सको पोल्टामा परेको छ ।

हेस्टिङ्सलाई घरमै फिल्म र टेलिभिजन हेर्ने तरिकामा क्रान्ति ल्याउने व्यक्तिका रूपमा लिइन्छ । उनले परम्परागत हलिउड मोडेललाई चुनौती दिँदै स्ट्रिमिङ युगको विस्तारमा महत्त्वपूर्ण भूमिका खेलेका थिए । 

विश्लेषक रिच्ड ए ग्रीन फिल्डका अनुसार कम्पनीको आर्थिक अवस्था सुधारोन्मुख रहे पनि हेस्टिङ्सको बहिर्गमनले लगानीकर्तालाई चिन्तित बनाएको छ । यद्यपि, नेटफ्लिक्सले आफ्नो लक्ष्य-विश्वभरका दर्शकलाई विभिन्न भाषा, संस्कृति र रुचिअनुसार मनोरञ्जन प्रदान गर्ने-यथावत् रहेको जनाएको छ ।