इरान युद्ध : एसियाली देशहरूलाई १० अर्ब डलर सहयोग गर्दै जापान
काठमाडौँ । जापानले इन्धन सङ्कटको सामना गरिरहेका एसियाली देशहरूलाई सहयोग गर्न १० अर्ब डलरको आर्थिक सहायता घोषणा गरेको छ । यो कदम इरानमा अमेरिका र इजरायली युद्धका विश्वव्यापी ऊर्जा आपूर्तिमा आएको अवरोधपछि उठाइएको हो।
जापानकी प्रधानमन्त्री सानाय ताकाइचीले बुधबार एसियाली नेताहरूसँगको भर्चुअल बैठकपछि नयाँ सहकार्य ढाँचा सार्वजनिक गरिन् । उनले एसियाली देशहरूबिच आपूर्ति शृङ्खलामार्फत गहिरो आपसी निर्भरता रहेको उल्लेख गरिन्।
ऊर्जा सङ्कटको मुख्य कारण स्टेट अफ होर्मुजमा देखिएको अस्थिरता हो, जहाँबाट विश्वमा खपत हुने २० प्रतिशत तेल आपूर्ति हुने गर्दछ, र यसको करिब ९० प्रतिशत तेल एसियातर्फ जाने गर्छ।
यस परियोजनाका लागि रकम जापान अन्तर्राष्ट्रिय सहयोग बैंक, जापान अन्तर्राष्ट्रिय सहयोग एजेन्सी र एसियाली विकास बैंकजस्ता संस्थामार्फत जुटाइनेछ । जापानले आफ्नै भण्डारबाट पनि तेल निकालिरहेको छ।सन २०२५ अन्त्यसम्म जापानसँग २५४ दिनलाई पुग्ने तेल भण्डारण थियो, तर हालको सङ्कटका कारण रणनीतिक भण्डारबाट तेल झिक्ने काम भइरहेको छ।
