राष्ट्रपति ट्रम्पद्वारा भेनेजुएलामाथि अमेरिकी आक्रमणको सम्भावना अस्वीकार
वासिङ्टन डीसी । अमेरिकी राष्ट्रपति डोनाल्ड ट्रम्पले भेनेजुएलाभित्र लागुऔषध तस्करी नियन्त्रण गर्न अमेरिकी सैन्य आक्रमण गर्ने कुनै पनि योजनालाई स्पष्ट रूपमा अस्वीकार गरेका छन् । उनको यो अभिव्यक्ति भेनेजुएलामा कोकेन उत्पादन केन्द्र र तस्करी मार्गहरूलाई लक्षित गर्ने अमेरिकी योजना तयार भइरहेको भन्ने रिपोर्टहरू सार्वजनिक भएपछि आएको हो ।
यसअघि अमेरिकी सिनेटर लिन्डसे ग्राहमले पनि भेनेजुएलामाथि सम्भावित भूमि आक्रमणलाई ‘वास्तविक विकल्प’ भन्दै चेतावनी दिएका थिए । उनका अनुसार वासिङ्टनले ल्याटिन अमेरिकामा फैलिएका नार्को–तस्करी सञ्जालहरू विरुद्धको अभियानलाई अझ सशक्त बनाउन खोजिरहेको छ ।
यस घटनाक्रमप्रति संयुक्त राष्ट्रसङ्घले गम्भीर चासो व्यक्त गर्दै अमेरिकालाई तत्काल यस्ता हवाई आक्रमण रोक्न आग्रह गरेको छ । संयुक्त राष्ट्रसङ्घका मानव अधिकारका लागि उच्चायुक्त भोल्कर टर्कले भने, ‘सेप्टेम्बरको सुरुदेखि क्यारिबियन र प्रशान्त क्षेत्रमा अमेरिकी सशस्त्र बलले गरेको निरन्तर हवाई आक्रमणमा ६० जनाभन्दा बढी व्यक्तिको मृत्यु भएको छ, जसका लागि अन्तर्राष्ट्रिय कानुनमा कुनै स्पष्ट औचित्य देखिँदैन ।’
उनले भने- ‘यी आक्रमणहरू र तिनको बढ्दो मानवीय मूल्य अस्वीकार्य छन् । अमेरिकाले तुरुन्तै यी आक्रमणहरू रोक्नुपर्छ र ती डुङ्गाहरूमा रहेका मानिसहरूको गैरन्यायिक हत्या रोक्नका लागि आवश्यक सबै उपायहरू अवलम्बन गर्नुपर्छ- उनीहरूविरुद्ध आपराधिक आचरणको आरोप जेसुकै किन नहोस् ।’
राष्ट्रपति ट्रम्पको भेनेजुएला आक्रमण अस्वीकार सम्बन्धी अभिव्यक्तिलाई राजनीतिक विश्लेषकहरूले अमेरिकाको क्षेत्रीय रणनीतिमा सावधानीपूर्वक सन्तुलन कायम गर्न खोजेको सङ्केतका रूपमा व्याख्या गरेका छन् ।
