अमेरिकि सरकारले उपहारस्वरूप दिएको १५ लाख डोज खोप काठमाडौं आइपुग्यो, ५० देखि ५४ वर्ष उमेर समूहकालाई प्राथमिकता

काठमाडौं । अमेरिकाले उपलब्ध गराएको जोन्सन एण्ड जोन्सनको १५ लाख डोज कोरोनाविरुद्धको खोप काठमाडौं आइपुगेको छ । यो खोप एकडोज मात्र लगाए पुग्छ ।

कतार एयरवेजको नियमित उडानमार्फत् ल्याइएको खोप त्रिभुवन अन्तर्राष्ट्रिय विमानस्थलमा अमेरिकी राजदूत र्‍याण्डी बेरीले स्वास्थ्य तथा जनसंख्यामन्त्री कृष्णगोपाल श्रेष्ठलाई हस्तान्तरण गरेका छन् ।अमेरिकी सरकारले उपहार स्वरुप दिएको यो खोप नेपाली नागरिकको जीवन रक्षाका लागि बरदान सावित हुने मन्त्री श्रेष्ठले बताए ।

प्राप्त भएको खोप प्राथमिकताका आधारमा ५० देखि ५४ वर्षको उमेर समूहका नागरिकलाई लगाउने तयारी रहेको भन्दै उनले छिट्टै खोप अभियान चलाउने जानकारी दिए । अमेरिकाले कोभ्याक्स कार्यक्रम मार्फत १५ लाख डोज खोप नेपाललाई उपलब्ध गराउने निर्णय गरेको थियो ।