बागमती प्रदेश सरकार मन्त्रिपरिषद् विस्तारसंगै पायो पूर्णता

जगत ठाडा मगर

२०८१ साउन १२ | मध्यान्ह ०२:०४ बजे

मकवानपुर, श्रावण १२ । मन्त्रालय संख्या थपेसँगै अन्ततः बागमती प्रदेश सरकारले पूर्णता पाएको छ। मुख्यमन्त्री बहादुर सिंह लामाले काँग्रेसका तर्फबाट थप ४ जना मन्त्री नियुक्त गरेपछि शनिबारबाट प्रदेश सरकारकाले पूर्णता पाएको हो ।

साउन ९ गते बुधवार मुख्यमन्त्री लामासँगै एमालेका ६ र काँग्रेसका ३ जना मन्त्रीले सपथ ग्रहण गरेका थिए । शनिबार काँग्रेसका तर्फबाट थप ४ जना मन्त्रीहरुले पद तथा गोपनीयताको सपथ लिएका छन् । प्रदेश प्रमुख यादवचन्द्र शर्माले काँग्रेसका तर्फबाट हरि प्रभा खड्गी, मिनकृष्ण महर्जन, सुरजचन्द्र लामिछाने र विमल ठकुरीलाई सपथ गराएका हुन् ।

खड्गीले सामाजिक विकास मन्त्रालय, महर्जनले युवा तथा खेलकुद मन्त्रालय, लामिछानेले आन्तरिक मामिला तथा कानुन मन्त्रालय र ठकुरीले पर्यटन तथा सहकारी मन्त्रालयको जिम्मेवारी पाएका हुन् । यसअघि विना विभागीय मन्त्री बनेका श्यामबहादुर खड्काले खानेपानी, ऊर्जा तथा सिँचाइ, कुन्दनराज काफ्लेले आर्थिक मामिला तथा योजना मन्त्रालयको जिम्मेवारी पाएका छन् । ९ गते नै मन्त्री नियुक्त भएका मदुकुमार श्रेष्ठको भने अझै जिम्मेवारी तोकिएको छैन । अब बागमती प्रदेशमा मन्त्रालयको संख्या १३ बाट १४ पुगेको छ ।

बागमती प्रदेशमा काँग्रेसबाट मुख्यमन्त्रीसहित ८ र एमालेबाट ६ जना मन्त्री बनेका छन् । आन्तरिक भागबण्डा नमिलेका कारण यस प्रदेशमा मन्त्रिपरिषद् विस्तारमा अन्यौलता रहँदै आएको थियो । १० गते मन्त्रिपरिषद् विस्तार हुने भनिए पनि अन्तिम समयमा सपथ ग्रहण कार्यक्रम नै रोकिएको थियो ।