बर्दघाटबाट ९ लाख ४६ हजार मूल्य बराबरको अवैध लत्ताकपडा बरामद

नवलपरासी, वैशाख १३ । पश्चिम नवलपरासीको बर्दघाट नगरपालिका – २ बाट प्रहरीले अवैध लत्ताकपडा बरामद गरेको छ । विशेष सूचनाको आधारमा जिल्ला प्रहरी कार्यालय पश्चिम नवलपरासीबाट प्रहरी सहायक निरीक्षक सुमान सिंह थापाको कमाण्डमा खटिएको गस्ती टोलीले बेवारिसे अवस्थामा लत्ताकपडा बरामद गरेको हो ।

प्रहरीले थान कपडा ३३ मिटर, थानको कपडा ९६ मिटर, कुर्ता सुरवाल १२० पिस, साडी ४९ पिस, कलर टिसर्ट ४४० पिस, सादा टिसर्ट ८२४ पिस र लेडिज टप्स ६६ पिस बरामद गरेको जिल्ला प्रहरी कार्यालय पश्चिम नवलपरासीका सूचना अधिकारी एवम् डीएसपी भोजराज पाण्डेले जानकारी दिए । उनका अनुसार बरामद गरिएको लत्ताकपडाको अन्दाजी मूल्य रु. ९,४६,९४० रहेको छ ।

अहिले उक्त कपडा नियन्त्रणमा लिई आवश्यक कारवाहीको लागी भन्सार कार्यालय महेशपुर पठाइएको र अवैध कपडा ओसारपसारमा संलग्न व्यक्तिको खोजतलास तथा अन्य आवश्यक अनुसन्धान भइरहेको डीएसपी पाण्डेले जानकारी दिए ।