कपिलवस्तुको महाराजगंमा १० दिने डल कुशन बनाउने तालिम सम्पन्न
कपिलवस्तु, माघ १७ । गृहिणीहरुलाई व्यावसायिक र आत्मनिर्भर बनाउने उद्धेश्यले कपिलवस्तुको महाराजगञ्ज नगरपालिका वडा नं.९ शिसवामा १० दिने आधारभूत डल तथा कुसन बनाउने तालिम सम्पन्न भएको छ ।
डायनामिक सामाजिक बिकास संस्था कपिलवस्तु नगरपालिका – १२ को आयोजना तथा महाराजगञ्ज नगरपालिका – ९ को वडा कार्यालयको आर्थिक सहयोगमा गत माघ ८ गतेदेखि आज मंगलबारसम्म तालिम सञ्चालन गरिएको थियो । तालिममा २५ जना सहभागी रहेका थिए ।
तालिम समापन समारोहमा बोल्दै महाराजगञ्ज नगरपालिका – ९ का वडा अध्यक्ष फरिद अहमद मुसलमानले गृहिणी दिदी बहिनीहरुलाई स्वरोजगार बनाउने उद्धेश्यले आयोजना गरिएको तालिम अत्यन्तै प्रभावकारी रहेको विश्वास व्यक्त गरे । तालिम समापन कार्यक्रमका प्रमुख अतिथिसमेत रहेका वडा अध्यक्ष मुसलमानले यस किसिमका कार्यक्रमले सकारात्मक सोचको अभिवृद्धि हुनुका साथै स्वावलम्वन र आत्मनिर्भर बनाउन सघाउ पुग्ने बताए ।
त्यस्तै डायनामिक सामाजिक विकास संस्थाका अध्यक्ष मोहम्मद इरफान मनसुरीले स्थानीय उत्पादनबाट स्वरोजगार बनी आय आर्जन बढाई आर्थिक रुपमा मजबुत बन्न र सहज जिवनयापनका लागि सिपमुलक तालिमले महिलाहरुमा सकारात्मक प्रभाव पार्ने बताए ।
