तामाङ समाज यूएईको २१औँ वार्षिक साधारणसभासँगै मिस तथा मिस्टर तामाङ यूएई प्रतियोगिता आयोजना हुने

कबिराज राजबंशी

२०८३ अशोज ७ | बिहान १२:०६ बजे

तामाङ समाज यूएईको २१औँ वार्षिक साधारणसभासँगै मिस तथा मिस्टर तामाङ यूएई प्रतियोगिता आयोजना

दुबई, युएई|

यूएईमा रहेका तामाङ समुदायभित्र लुकेर रहेका प्रतिभाको खोजी, पहिचान र प्रोत्साहन गर्ने उद्देश्यले ‘तामाङ प्रतिभाको खोजी’ कार्यक्रम आयोजना हुने भएको छ। तामाङ समाज यूएईको आयोजनामा आगामी ४ अक्टोबर २०२६ मा समाजको २१औँ वार्षिक साधारणसभासँगै उक्त कार्यक्रम आयोजना गर्न लागिएको हो।

समाजका महासचिव सबिन मोक्तानका अनुसार कार्यक्रम यूएईको एसके–७ क्लब हलमा दिउँसो १२ बजेदेखि सञ्चालन हुनेछ। कार्यक्रममा तामाङ समुदायका विभिन्न क्षेत्रमा रहेका प्रतिभाहरूलाई आफ्नो कला तथा क्षमता प्रस्तुत गर्ने अवसर प्रदान गरिनेछ।

कार्यक्रमअन्तर्गत ‘मिस तामाङ यूएई’ र ‘मिस्टर तामाङ यूएई’ प्रतियोगितासमेत आयोजना हुने भएको छ। त्यसैगरी नृत्य र गायन विधामा समेत प्रतियोगिता सञ्चालन गरिने आयोजकले जनाएको छ।

यूएईमा रोजगारी तथा विभिन्न सिलसिलामा बसोबास गर्दै आएका तामाङ युवायुवतीको प्रतिभालाई समुदायस्तरबाटै पहिचान गरी उनीहरूलाई थप प्रोत्साहन गर्ने कार्यक्रमको मुख्य उद्देश्य रहेको आयोजकको भनाइ छ। ‘प्रतिभाको खोजी, प्रतिभाको सम्मान’ भन्ने मूल नारासहित आयोजना हुन लागेको कार्यक्रमले नयाँ पुस्ताका तामाङ प्रतिभालाई आफ्नो क्षमता प्रस्तुत गर्ने महत्वपूर्ण अवसर प्रदान गर्ने अपेक्षा गरिएको छ।

आयोजकका अनुसार हालसम्म नृत्य, गायन, मिस्टर तामाङ र मिस तामाङ गरी २७ जना प्रतियोगीले आफ्नो नाम दर्ता गराइसकेका छन्। प्रतियोगितामा सहभागी हुन इच्छुक यूएईमा रहेका अन्य तामाङ दाजुभाइ तथा दिदीबहिनीले पनि आयोजकले उपलब्ध गराएको अनलाइन फारममार्फत आफ्नो नाम दर्ता गराउन सक्नेछन्।

तामाङ समाज यूएईले इच्छुक सबैलाई समयमै नाम दर्ता गरी कार्यक्रममा सहभागी हुन आग्रह गरेको छ। समाजले कार्यक्रमलाई तामाङ समुदायको कला, संस्कृति, प्रतिभा र पहिचानलाई प्रवर्द्धन गर्ने साझा अवसरका रूपमा लिएको जनाएको छ।