किमद्वारा नयाँ हतियार प्रणालीको प्रशंसा
काठमाडाैँ । उत्तर कोरियाली नेता किम जोङ उनले नयाँ प्रकारको हतियार प्रणालीको परीक्षण निरीक्षण गर्दै त्यसलाई देशको उन्नत सैन्य प्रविधिको प्रमाण भएको बताएका छन्। दक्षिण कोरिया र जापानले प्योङयाङबाट दुईवटा छोटो दूरीका ब्यालेस्टिक क्षेप्यास्त्र प्रहार भएको जनाएको दुई दिनपछि उत्तर कोरियाले नयाँ हतियार परीक्षणको विवरण सार्वजनिक गरेको हो।
उत्तर कोरियाको सरकारी सञ्चारमाध्यम केसीएनएका अनुसार मिसाइल ब्युरोले आइतबार किमको उपस्थितिमा नयाँ हतियारको सफल परीक्षण गरेको थियो। परीक्षण गरिएको हतियारको प्रकार भने प्योङयाङले खुलाएको छैन। किमले उक्त परीक्षणलाई ‘अत्याधुनिक रक्षा प्रविधिको उल्लेखनीय प्रदर्शन’ भन्दै यस्तो प्रविधिले विरोधीलाई गम्भीर चुनौती दिने बताए।
दक्षिण कोरिया र जापानले पछिल्लो क्षेप्यास्त्र प्रहारलाई क्षेत्रीय शान्ति तथा सुरक्षाका लागि खतरा भन्दै निन्दा गरेका छन्। सियोलले त्यसलाई संयुक्त राष्ट्रसङ्घीय सुरक्षा परिषद्का प्रस्तावको उल्लङ्घन भन्दै क्षेप्यास्त्र गतिविधि रोक्न आग्रह गरेको छ भने जापानले पनि कडा विरोध जनाएको छ।
उत्तर कोरियाले आफ्नो आणविक हतियार सम्पन्न राष्ट्रको हैसियत स्थायी र अपरिवर्तनीय रहेको बताउँदै आएको छ । गत साता उसले आफ्ना आणविक गतिविधि रोक्न माग गर्दै अन्तर्राष्ट्रिय आणविक ऊर्जा एजेन्सी (आइएइए) ले पारित गरेको प्रस्ताव अस्वीकार गर्दै त्यस्तो प्रस्तावले आफ्नो आणविक हैसियतमा कुनै प्रभाव नपार्ने बताएको थियो। किमकी बहिनी किम यो जोङले पनि हालै उत्तर कोरियाको आणविक हैसियत ‘निरपेक्ष’ रहेको बताएका थिए।
