प्रदर्शनमा प्रहरीको हत्या गरेको आरोपमा इरानमा दुई जनालाई मृत्युदण्ड

तेहरान । जनवरी महिनामा भएको सरकारविरोधी प्रदर्शनका क्रममा प्रहरी अधिकारीहरूको हत्या गरेको आरोपमा इरानमा दुई जनालाई मृत्युदण्ड दिइएको छ ।

सरकारी समाचार संस्था फार्सका अनुसार उनीहरूलाई मंगलबार मृत्युदण्ड दिइएको हो । फार्सका अनुसार दुवै जनाले जनवरी १८ मा इस्फाहानको शहिद अलिखानी चोकमा भएको प्रदर्शनका क्रममा प्रहरी अधिकारीहरूलाई डोरीले साइनपोस्टमा बाँधी ढुंगाले आक्रमण गरेका थिए । त्यसपछि उनीहरूमाथि पेट्रोल खन्याएर आगो लगाइएको र जीवित अवस्थामै घिसार्दै चक्कु तथा खुकुरीजस्ता धारिलो हतियारले आक्रमण गरिएको आरोप लगाइएको छ ।

संयुक्त राष्ट्रसंघले यी मृत्युदण्डहरू निष्पक्ष न्यायिक प्रक्रियाको मापदण्ड पूरा नगरेको देखिने सुनुवाइपछि गरिएको भन्दै तत्काल मृत्युदण्ड रोक्न इरानलाई आग्रह गरेको छ । संयुक्त राष्ट्रसंघका अनुसार यस वर्ष मात्रै जनवरी प्रदर्शनसँग सम्बन्धित आरोपमा कम्तीमा २४ जनालाई मृत्युदण्ड दिइसकिएको छ ।

यसैबीच, प्रदर्शनका क्रममा भएको मृत्युबारे सरकारी र स्वतन्त्र स्रोतका तथ्यांकमा ठूलो अन्तर देखिएको छ । इरानी सरकारले प्रदर्शनका क्रममा ३ हजार ११७ जनाको मृत्यु भएको जनाएको छ । तर अमेरिकास्थित मानवअधिकार संस्था एचआरएएनए ले ७ हजारभन्दा बढी मृत्युको अभिलेख तयार गरिसकेको र थप करिब १२ हजार मामिलाको अनुसन्धान गरिरहेको जनाएको छ ।

इरानसम्बन्धी संयुक्त राष्ट्रसंघकी विशेष प्रतिवेदक माइ सातोले नागरिकको मृत्यु संख्या २० हजारभन्दा बढी हुन सक्ने अनुमान गरेकी छन् । यद्यपि, सरकारले लगाएको इन्टरनेट प्रतिबन्धका कारण वास्तविक अवस्था स्वतन्त्र रूपमा पुष्टि गर्न कठिन भएको उनको भनाइ छ ।