बाजुरामा गगन र देउवा पक्षद्वारा छुट्टाछुट्टै रूपमा विपी स्मृति दिवस मनाइयो

दुबै पक्षले आयोजना गरेको कार्यक्रममा बाक्लो सहभागिता देखिएको थियो । कार्यक्रममा सहभागी नेताहरूले पार्टीलाई थप सुदृढ, लोकतान्त्रिक र जनमुखी बनाउन युवाको भूमिका महत्वपूर्ण रहेको बताए। नेताहरुले संगठनलाई एकताबद्ध बनाएर जनताको विश्वास जित्नुपर्नेमा जोड दिएका थिए। त्यस्तै, देउवा पक्षले आयोजना गरेको कार्यक्रममा पनि विपी कोइरालाको राजनीतिक योगदानको स्मरण गर्दै पार्टीभित्र आपसी सहकार्य, अनुशासन र संगठनात्मक एकतालाई मजबुत बनाउनुपर्ने आवश्यकता औंल्याइएको थियो।

कांग्रेसलाई बलियो बनाउन सबै नेता,कार्यकर्ता एकजुट हुनुपर्ने धारणा राखेका थिए। एउटै उद्देश्य र एउटै महान् नेताको स्मृतिमा कार्यक्रम आयोजना गरिए पनि फरक–फरक रूपमा कार्यक्रम सम्पन्न हुनु कांग्रेसभित्रको आन्तरिक समीकरणको प्रतिबिम्बका रूपमा हेरिएको छ। जिल्लाको राजनीतिक वृत्तमा समेत विभिन्न टिकाटिप्पणीहरू हुन थालेका छन् ।

कतिपयले यसलाई आन्तरिक प्रतिस्पर्धाको सामान्य प्रक्रिया मानेका छन् भने कतिपयले यसले पार्टी एकतामा चुनौती थप्न सक्ने बताएका छन्। यद्यपि दुवै पक्षका नेताहरूले कार्यक्रम फरक भए पनि उद्देश्य विपी कोइरालाको योगदानको सम्मान गर्नु र उहाँका विचारलाई नयाँ पुस्तामाझ पुर्‍याउनु नै रहेको बताएका छन्।