मादुरोका सहयोगी एलेक्स साब अमेरिका सुपुर्दगी

भेनेजुएला । भेनेजुएलाका पूर्व राष्ट्रपति निकोलस मादुरोका निकटका सहयोगी तथा कोलम्बियाली मूलका व्यवसायी एलेक्स साबलाई अमेरिका सुपुर्दगी गरिएको छ। भेनेजुएलाको अध्यागमन एजेन्सीले शनिबार उनलाई अमेरिका पठाइएको पुष्टि गरेको हो।

५४ वर्षीय साबलाई गत फेब्रुअरीमा काराकासबाट अमेरिकी र भेनेजुएलाका सुरक्षाकर्मीहरूको संयुक्त अपरेसनमा पक्राउ गरिएको थियो। भेनेजुएलाकी कार्यवाहक राष्ट्रपति डेल्सी रोड्रिग्वेजको नेतृत्वमा अमेरिकासँग बढेको सुरक्षा समन्वयको नतिजास्वरूप यो सुपुर्दगी भएको मानिएको छ।

पूर्व राष्ट्रपति निकोलस मादुरो र उनकी पत्नी सिलिया फ्लोरेस यसअघि नै ‘नार्कोट्यारोरिज्म’ (लागूऔषध आतंकवाद) को मुद्दामा न्यूयोर्कमा हिरासतमा छन्। अमेरिकी अधिकारीहरूका अनुसार, एलेक्स साबको सुपुर्दगीले मादुरोविरुद्धको फौजदारी मुद्दालाई थप बलियो बनाउन महत्त्वपूर्ण प्रमाण र सूचनाहरू उपलब्ध गराउन सक्छ।

साब यसअघि सन् २०२० मा केप भर्डमा पक्राउ परेर अमेरिकामा हिरासतमा रहेका थिए। तर, सन् २०२३ मा भेनेजुएलामा रहेका अमेरिकी बन्दीहरूलाई रिहा गर्ने सम्झौता अनुरूप उनलाई क्लेमेन्सी (क्षमादान) दिएर छोडिएको थियो। पुन: पक्राउ परेपछि उनलाई अहिले फेरि अमेरिका लगिएको हो।