अमेरिकी दबाबमा जबरजस्ती वार्ता नगर्ने इरानको अडान

वाशिटन डीसी । इरानका राष्ट्रपति मसुद पेजेशकियानले अमेरिकाको दबाब र धम्कीका बीच इरान जबरजस्ती वार्तामा प्रवेश नगर्ने स्पष्ट पारेका छन् । इरानको सरकारी प्रसारक इस्लामिक रिपब्लिक अफ इरान ब्रोडकाष्टिङ (आईआरआईबी) अनुसार उनले यस्तो धारणा व्यक्त गरेका हुन् । 

पाकिस्तानका प्रधानमन्त्रीशहबाज शरिफसँग टेलिफोन संवादका क्रममा पेजेशकियानले अमेरिकाका हालका कदमहरूले विश्वासको वातावरण कमजोर बनाएको र वार्ताको सम्भावनालाई जटिल बनाएको बताएका थिए । उनका अनुसार वाशिङ्टनले शत्रुतापूर्ण गतिविधि र सञ्चालनात्मक दबाब अन्त्य नगरेसम्म प्रगति कठिन रहनेछ ।

उनले सामाजिक सञ्जालमार्फत इरानले विदेशमन्त्री अब्बास अराघचीको नेतृत्वमा उच्चस्तरीय प्रतिनिधिमण्डल इस्लामाबाद पठाएकोमा आभार पनि व्यक्त गरेका थिए । उक्त इरानी प्रतिनिधिमण्डल शनिबार पाकिस्तान भ्रमण सकेर ओमानको मस्कट पुगेको छ, जहाँ थप क्षेत्रीय वार्ता जारी रहने बताइएको छ ।