‘केडी : द डेविल’ को अश्लील गीत विवाद : नोरा फतेहीलाई अन्तिम मौका

मुम्बई । कन्नड फिल्म ‘केडी: द डेविल’ को ‘सरके चुनर तेरी’ बोलको गीतमा प्रयोग भएका अश्लील शब्दका कारण अभिनेत्री नोरा फतेहीको समस्या बढ्दै गएको छ । अप्रिल ६ मा भारतको राष्ट्रिय महिला आयोगमा भएको सुनुवाइमा उपस्थित नभएपछि आयोगले कडा आपत्ति जनाउँदै उनलाई अप्रिल २७ मा हाजिर हुन अन्तिम मौका दिएको छ । आयोगकी अध्यक्ष विजया रहाटकरले सिर्जनाका नाममा महिलाको गरिमामाथि खेलबाड गर्न नपाइने चेतावनी दिएकी छन् । सुनुवाइका क्रममा गीतका गीतकार रकिब आलम, निर्देशक प्रेम र निर्माण पक्षका प्रतिनिधिहरू उपस्थित भएर लिखित रूपमै माफी मागेका छन् । 

उनीहरूले गीतका बोल आपत्तिजनक रहेको र यसले समाजमा नकारात्मक प्रभाव पारेको स्वीकार गर्दै आगामी तीन महिनासम्म महिला सशक्तीकरणका लागि काम गर्ने र त्यसको रिपोर्ट आयोगलाई बुझाउने प्रतिबद्धता समेत जनाएका छन् । नोरा आफैँ उपस्थित नभई वकिल पठाएपछि आयोग थप रुष्ट बनेको हो । यसै विषयमा बयान लिन आयोगले अभिनेता सञ्जय दत्तलाई पनि अप्रिल ८ मा उपस्थित हुन पत्र जारी गरेको छ ।

विवाद चर्किएपछि नोरा फतेहीले भने आफूलाई झुक्याएर गीत सुट गराइएको स्पष्टीकरण दिएकी छन् । उनले कन्नड भाषामा गलत अनुवाद सुनाएर छायाङ्कन गरिएको र पछि आफ्नो अनुमति बिना नै एआई प्रविधि प्रयोग गरी हिन्दी संस्करण सार्वजनिक गरिएको दाबी गरेकी छन् । 

गीत सार्वजनिक हुने कार्यक्रममा पुगेपछि मात्र आफूले हिन्दी शब्दहरू थाहा पाएको र ती शब्द सुनेर आफू आफैँ स्तब्ध भएको उनले बताएकी छन् । उनले गीतका शब्दहरू अनुचित रहेको कुरामा आफू सहमत रहेको पनि उल्लेख गरेकी छन् ।

प्यान इन्डिया फिल्मका रूपमा निर्माण भएको ‘केडी : द डेविल’ आगामी अप्रिल ३० मा रिलिज हुँदैछ । मार्च १४ मा सार्वजनिक भएको यो गीतमा नोरा र सञ्जय दत्तले अभिनय गरेका छन् । 

युट्युबमा रिलिज हुनासाथ गीतका शब्द र नृत्यका शैलीहरू अश्लील तथा द्विअर्थी भएको भन्दै सामाजिक सञ्जालमा चर्को आलोचना भएको थियो । व्यापक विरोध र उजुरीपछि अहिले यो गीतलाई युट्युबबाट हटाइएको छ ।