कविता : टुक्का

१) अर्काको देश अर्कैको भेष यस्तै छ जिन्दगी
मेसिन जस्तै जोतिनु पर्छ साहुको बन्दकी ।

२) जहाज सँगै बोकेर ल्याएँ सपना हजार
तौलेर यहाँ जिन्दगी बिक्छ मान्छेकै बजार ।

३) पसिना बग्छ समुद्र सरि तातो यो खाडीमा
ईज्जत कहाँ झल्केला प्यारी महंगो साडीमा ।

४) गरेर आँट बस्नु पो पर्छ बलियो घरमा
शिशाको घर कच्चा पो हुन्छ संसार भरमा ।

५) सत्ताको लागि कति पो गर्छौ अरण्य रोदन
जनता सबै बाठा भै सके गाउँ गै सोधन ।

लेखक : डम्बर थामी ‘अनुपम’
कालिन्चोक गा.पा.-६, दोलखा