इरानी नागरिकलाई प्रदर्शनमा ननिस्कन रिभोल्युसनरी गार्ड्सको चेतावनी
तेहरान । इरानको इस्लामिक रिभोल्युसनरी गार्ड कर्प्स (आईआरजीसी)को गुप्तचर इकाईले नागरिकलाई सडक प्रदर्शनमा सहभागी नहुन चेतावनी दिएको खुलासा भएको छ । इरानभित्रबाट आफूलाई पठाइएका दुईवटा सन्देशका स्क्रिन सटमा यस्तो चेतावनी देखिएको भन्दै बीबीसीले समाचार छापेको छ ।
अर्को सन्देशमा आईआरजीसीले नागरिकलाई कुनै पनि विरोधी–सुरक्षा गतिविधि देखेमा फोन गरेर जानकारी दिन आग्रह गरेको छ । आयतोल्लाह अली खामेनीको निधनपछि देशका विभिन्न सहरहरूमा सडकमा भेला भई उत्सव मनाइएको दृश्यहरू आफूले पुष्टि गरेको बीबीसीले बताएको थियो । इरानका सरकारी तथा स्थानीय सञ्चारमाध्यमहरूले तेहरान लगायतका सहरमा शोकसभा पनि भइरहेको खबर पनि आएको थियो ।
इरानका अधिकांश नागरिकका लागि इन्टरनेट सेवा अझै अवरुद्ध रहेकाले देशभित्रको वास्तविक अवस्था स्पष्ट रूपमा बुझ्न कठिन भइरहेको बताइएको छ । केही व्यक्तिहरू भने स्याटेलाइट इन्टरनेट सेवा स्टार लिङ्कजस्ता माध्यम प्रयोग गरेर अनलाइनमा पहुँच बनाएका छन् ।
