अबुधाबीमा इरानी प्रत्याक्रमणमा मारिएका नेपाली गोरखाका दिवस श्रेष्ठ

काठमाडौ । संयुक्त अरब इमिरेट्सको राजधानी अबुधाबीमा मारिएका नेपाली नागरिक गोरखाका दिवस श्रेष्ठ रहेको पुष्टि भएको छ । त्यहाँस्थित नेपाली दूतावासका अनुसार २९ वर्षे श्रेष्ठ अस्ति इरानमाथि अमेरिका र इजरायलले गरेको आक्रमणपछि भएको इरानी प्रत्याक्रमणमा मारिएका हुन् ।

उक्त घटनामा पाकिस्तान र बंगलादेशका पनि एक/एक जना मारिएका छन् । अबुधाबीस्थित अन्तर्राष्ट्रिय विमानस्थलमा ड्रोन निष्क्रिय पार्ने क्रममा भएको घटनामा मिडल इस्ट कम्पनीमा सेक्युरिटी गार्डको रुपमा कार्यरत श्रेष्ठको निधन भएको दूतावासले जनाएको छ ।

परिस्थिति सहज भएपछि श्रेष्ठको पार्थिव शरीर स्वदेश फिर्ता गरिने जारी विज्ञप्तिमा उल्लेख छ । अमेरिका र इजरायलले इरानमा आक्रमण गरेपछि मध्यपूर्वका अधिकांश मुलुकले हवाइ क्षेत्र बन्द गरेकाले अधिकांश उडान ठप्प छ । हजारौं यात्रु मध्यपूर्व र अन्यत्र मुलुकमा रोकिएका छन् ।

मध्यपूर्वका विभिन्न मुलकमा रोजगारीका लागि झण्डै २० लाख नेपाली पुगेका छन् ।