सिरियामा सरकारी सेना र कुर्द नेतृत्वको बलबिच युद्धविराम १५ दिन थपियो

दमस्कस । सिरियाली सरकार र कुर्द नेतृत्वको सिरियन डेमोक्रेटिक फोर्सेस (एसडीएफ)बीच लागू गरिएको युद्धविरामको म्याद अरु १५ दिन थपिएको छ । चार दिने युद्धविराम शनिबार समाप्त भएको केही घण्टापछि सिरियाको रक्षा मन्त्रालयले नयाँ निर्णय सार्वजनिक गरेको हो ।

गत तीन सातायता सिरियाली सरकारी सेना र एसडीएफबीच तीव्र झडपहरू भएका थिए, जसका क्रममा एसडीएफले आफूले नियन्त्रण गर्दै आएको ठूलो भू–भाग गुमाएको बताइएको छ । यसैबीच, कुर्द नेतृत्वको बलले अन्तर्राष्ट्रिय समुदायलाई सम्भावित तनाव वृद्धि रोक्न पहल गर्न आग्रह गरेको थियो । युद्धविराम समाप्त हुने समयमा सरकारी सेनाले उत्तरपूर्वी सिरियामा थप सैनिक तथा सामग्री पठाइरहेको समाचार आएका थिए ।

गत मार्चमा सिरियाको अन्तरिम सरकारले एसडीएफसँग एक सम्झौता गर्दै उसले नियन्त्रणमा लिएको भूभाग सरकारलाई हस्तान्तरण गर्ने र अन्ततः आफ्ना लडाकुहरूलाई सरकारी सेनामा समाहित गर्ने सहमति गरेको थियो । तर जनवरीको सुरुवातमा भएको नयाँ वार्तामा सहमति नजुटेपछि फेरि लडाइँ चर्कियो । सप्ताहान्तमा नयाँ संस्करणको सम्झौता हस्ताक्षर भएपछि पुनः चार दिने युद्धविराम घोषणा गरिएको थियो । नयाँ सम्झौताअनुसार एसडीएफका सदस्यहरू व्यक्तिगत रूपमा सेना र प्रहरी बलमा समाहित हुनुपर्ने प्रावधान छ ।