चिलीमा भीषण डढेलो: १८ को मृत्यु, दुई क्षेत्रमा संकटकाल घोषणा

नुब्ले । चिलीको मध्य र दक्षिणी क्षेत्रमा फैलिएको विनाशकारी वन डढेलोका कारण मृत्यु हुनेको संख्या १८ पुगेको छ। राष्ट्रपति ग्याब्रिएल बोरिकले बायोबियो क्षेत्रको कन्सेप्सनमा सञ्चारकर्मीहरूसँग कुरा गर्दै मृतकको संख्या अझै बढ्न सक्ने चेतावनी दिएका छन्। तीव्र हावा र अत्यधिक गर्मीका कारण डढेलो अनियन्त्रित बनेपछि सरकारले नुब्ले र बायोबियो क्षेत्रमा संकटकाल घोषणा गरेको छ।

विपद्को सामना गर्न करिब ४ हजार अग्नि नियन्त्रक र सैनिक टोली परिचालन गरिएको छ। ५० हजारभन्दा बढी मानिसलाई सुरक्षित स्थानमा स्थानान्तरण गरिएको छ। चिलीमा सन् २०२४ को फेब्रुअरीमा भएको डढेलोमा १३० भन्दा बढीको ज्यान गएको थियो, जसलाई देशकै ठूलो प्राकृतिक विपद् मानिन्छ।