बेनिनमा कूको प्रयास असफल : राष्ट्रपति तालोनद्वारा स्थिति नियन्त्रणमा रहेको पुष्टि

बेनिन । पश्चिम अफ्रिकी राष्ट्र बेनिनमा भएको सैन्य ‘कू’ को प्रयासलाई सरकारले असफल पारेको छ। ‘कू’ प्रयासपछि राष्ट्रपति प्याट्रिस तालोनले टेलिभिजनमा देखा परेर देशको स्थिति ‘पूर्ण रूपमा नियन्त्रणमा’ रहेको भन्दै नागरिकहरूलाई आश्वस्त पारेका हुन्।

टेलिभिजनमा प्रत्यक्ष प्रसारणका क्रममा शान्त देखिएका तालोनले भने, ‘म राष्ट्रप्रति इमानदार र वफादार रहेका हाम्रा सेना र तिनका नेतृत्वहरूले प्रदर्शन गरेको कर्तव्यपरायणताको भावनाको प्रशंसा गर्न चाहन्छु।’

सैनिकहरूको एक समूहले राष्ट्रिय टेलिभिजनमा कब्जाको घोषणा गरेको केही घण्टापछि नै सरकारले विद्रोहलाई विफल पारेको बताएको थियो। पछि दिउँसो, बेनिनको सबैभन्दा ठुलो सहर तथा सरकारी मुख्यालय कोटोनाउमा ठुला विस्फोटनहरू सुनिएका थिए, जसलाई हवाई हमलाको परिणाम मानिएको छ।

विस्फोटनअघि उडान ट्र्याकिङ डाटाले तीनवटा विमान छिमेकी नाइजेरियाबाट बेनिनको हवाई क्षेत्रमा प्रवेश गरेको र त्यसपछि फर्किएको देखाएको थियो। नाइजेरियाका राष्ट्रपतिका प्रवक्ताले पछि आफ्नो लडाकु विमानहरू ‘कू’ गर्ने षड्यन्त्रकारीहरूलाई राष्ट्रिय टेलिभिजन र उनीहरू भेला भएका सैन्य शिविरबाट हटाउन ‘हवाई क्षेत्र कब्जा गर्न’ गएको पुष्टि गरे।

पूर्व फ्रान्सेली उपनिवेश बेनिनलाई अफ्रिकाको सबैभन्दा स्थिर लोकतन्त्रमध्ये एक मानिन्छ, तर राष्ट्रपति तालोनमाथि आफ्ना नीतिहरूको आलोचना दबाएको आरोप लाग्दै आएको छ। 

पश्चिम अफ्रिकामा यसअघि पनि शृङ्खलाबद्ध कू प्रयासहरू भएकाले यस क्षेत्रको सुरक्षा बिग्रन सक्ने चिन्ता बढेको छ।