केन्याली महिलाको हत्या आरोपमा पूर्वबेलायती सैनिक पक्राउ
एजेन्सी
२०८२ कार्तिक २२ | बिहान ११:०७ बजे
विल्टशायर । सन् २०१२ मा केन्यामा एक २१ वर्षीया महिलाको कथित हत्याको आरोपमा एक पूर्वबेलायती सैनिकलाई प्रत्यार्पणको सामना गर्नुपरेको छ।नेशनल क्राइम एजेन्सी (एनसीए) का अनुसार पूर्वसैनिक रोबर्ट जेम्स पुरकिसलाई नोभेम्बर ६ मा विल्टशायरको टिडवर्थमा पक्राउ गरिएको थियो र उनी शुक्रबार वेस्टमिन्स्टर मजिस्ट्रेट अदालतमा उपस्थित भए। उनलाई एजेन्सीले सेप्टेम्बरमा वारेन्ट जारी भएपछि एग्नेस वान्जिरुको हत्याको सम्बन्धमा पक्राउ गरेको हो।
३८ वर्षीय पुरकिसले अदालतमा प्रत्यार्पणको विरोध गर्ने बताएका छन् । उनलाई नोभेम्बर १४ मा अर्को सुनुवाइ नभएसम्म हिरासतमा राखिएको छ। उनका वकिलहरूले उनले हत्या आरोपको ‘जोरदार खण्डन’ गर्ने बताएका छन्।
वान्जिरुको शव सन् २०१२ मा उनी बेपत्ता भएको तीन महिनापछि नैरोबीबाट करिब २०० किलोमिटर उत्तरमा रहेको नान्युकी सहरको एक होटल नजिकै सेप्टिक ट्याङ्कीमा फेला परेको थियो। उनको मृत्यु हुँदा उनको गर्भमा पाँच महिनाको बच्चा थियो।
उनको शव बेलायती सेनाको तालिम शिविर नजिकै भेटिएको थियो। वान्जिरुको परिवारले बेलायती सेनाले उनको मृत्यु लुकाएको र केन्याली अधिकारीहरूले समयमै अनुसन्धान नगरेको आरोप लगाउँदै आएका छन्।
वान्जिरुकी भतिजी इस्थर एन्जोकीले यो गिरफ्तारीबाट आफूहरूले न्याय पाउने दिशामा महत्त्वपूर्ण कदम चालेको भन्दै राहत व्यक्त गरेकी छन्।
