पत्रकार र एनजीओकर्मीलाई ‘देशको दुस्मन’का रूपमा प्रचार गर्दै पाकिस्तान

काठमाडौं । पाकिस्तानको राजनीतिमा आजभोलि एक सरकारी विज्ञापनका कारण हलचल मच्चिएको छ । यसको मूल कारण पाकिस्तानी सरकारतर्फबाट प्रकाशित एक आधा पृष्ठको विज्ञापन हो । जसमा पत्रकार, फ्रिलान्सर, एनजीओकर्मी र नागरिक समाजका सदस्यलाई ‘दुस्मनको प्रचार सामग्री’ फैलाउने आरोप लगाइएको छ ।

यस विज्ञापनले प्रेस स्वतन्त्रता र मानव अधिकार कार्यकर्ताहरूमा व्यापक आक्रोश पैदा गरेको छ । 
यो विज्ञापन अक्टोबर १ र २ मा धेरै ठूला अखबारहरूमा प्रकाशित गरिएको थियो, जसमा आजको युद्ध बन्दुकले होइन, सूचनाले लडिने भनिएको थियो ।

विज्ञापनमा आजको दुस्मन बन्दुकको सट्टा सूचनाको प्रयोग गर्छ र यो दुश्मन कहिलेकाहीँ पत्रकार, एनजीओ कर्मचारी वा फ्रिलान्सरको रूपमा देखिन सक्ने भनिएको थियो । यसमार्फत उनीहरूले संवेदनशील जानकारी लिएर डर र अशान्ति फैलाउन सक्ने उल्लेख गरिएको छ ।

सञ्चार संस्थाहरूले विज्ञापनको आलोचना गरे
यस विषयमा फ्रिडम नेटवर्क नामक मिडिया संस्थाले विज्ञापनको कडा आलोचना गरेको छ । साथै, यस विज्ञापनले पत्रकार र नागरिक समाजका सदस्यहरूलाई खतरामा पार्ने भन्दै आपत्ति जनाएको छ । किनभने यसलाई राष्ट्रिय सुरक्षाका लागि खतरा मानिएको छ ।

यस्तै, ह्युमन राइट्स कमिसन अफ पाकिस्तान, वुमेन्स एक्सन फोरम (लाहौर), सिरकत गा, साउथ एसिया पार्टनरसिप–पाकिस्तान, सिमोर्घ र क्लास जस्ता मानव अधिकार संस्थाहरूले पनि विज्ञापनको निन्दा गरेका छन् । यी संस्थाहरूले यो विज्ञापनले पाकिस्तानमा पहिलेदेखि नै कम हुँदै गएको स्वतन्त्र आवाजलाई अझ दबाउने काम गर्ने बताएका छन् ।

विज्ञहरूको भनाइ
यो विज्ञापन यस्तो समयमा आएको छ, जब सरकारले डिजिटल मिडिया र सामाजिक सञ्जालमा, विशेषगरी एक विपक्षी नेता जेल गएपछि, कडा निगरानी सुरु गरेको छ । अधिकारकर्मीहरूले यस विज्ञापनका कारण पत्रकारहरू र एनजीओहरूमाथि आक्रमण बढ्न सक्ने र उनीहरूको आवाज दबिन सक्ने चिन्ता व्यक्त गरेका छन् ।

यता, सरकारद्वारा स्वतन्त्र आवाजलाई ‘दुस्मन’ घोषित गर्नु लोकतान्त्रिक अधिकारमाथि खतरा हुने र मानिसहरू डरका कारण सत्य बोल्न नसक्ने अवस्था आउने विज्ञहरूको भनाइ छ । द ट्रिब्युनबाट ।