अध्यागमन तथा भन्सार प्रवर्तन केन्द्रमा स्नाइपर हमला : एक बन्दीको मृत्यु, दुई गम्भीर घाइते
टेक्सस । टेक्ससको डल्लासमा रहेको अमेरिकी अध्यागमन तथा भन्सार प्रवर्तन (आईसीई) केन्द्रमा छतबाट स्नाइपरले अन्धाधुन्ध गोली चलाउँदा एक बन्दीको मृत्यु भएको छ भने अन्य दुई जना गम्भीर रूपमा घाइते भएका छन्। अधिकारीहरूका अनुसार, बन्दुकधारीले आईसीई सुविधा र नजिकैको चिन्ह नभएको भ्यानलाई लक्षित गरी अन्धाधुन्ध गोली चलाएका थिए। त्यसपछि उनले आफैँलाई गोली हानेर आत्महत्या गरेका थिए। यस घटनामा कुनै पनि कानून प्रवर्तन अधिकारी घाइते भएका छैनन्।
अधिकारीहरूले आक्रमणकारीको पहिचान २९ वर्षीय जोशुआ जानको रूपमा गरेका छन्। एफबीआई निर्देशक काश पटेलले घटनास्थलबाट बरामद भएको गोलीको फोटो एक्समा पोस्ट गर्दै, एउटा गोलीको खोलमा ‘एन्टी आईसीई’ वाक्यांश लेखिएको देखाए।एफबीआईका विशेष एजेन्ट जो रोथ्रोकले पत्रकार सम्मेलनमा बन्दुकधारी नजिक फेला परेका गोलीका खोलहरूमा ‘आईसीई-विरोधी प्रकृतिका सन्देशहरू’ रहेको बताए।
मतदाता रेकर्डका अनुसार आक्रमणकारी जान एक स्वतन्त्र मतदाताको रूपमा दर्ता भएका थिए र उनले पछिल्लो पटक २०२४ को आम निर्वाचनमा मतदान गरेका थिए। जानमाथि सन् २०१६ मा टेक्ससमा गाँजासँग सम्बन्धित आरोपहरू लागेका थिए।
