अस्ट्रेलियाको तटीय क्षेत्रका १५ लाख मानिस खतरामा
क्यानबेरा । समुद्री सतह बढ्दै जाँदा २०५० सम्ममा अस्ट्रेलियामा तटीय क्षेत्रहरूमा बसोबास गर्ने करिब १५ लाख मानिसहरू खतरामा पर्ने अनुमान अस्ट्रेलियाको एउटा जलवायु प्रतिवेदनले गरेको छ । यो अस्ट्रेलियाको पहिलो राष्ट्रिय जलवायु जोखिम मूल्याङ्कन हो । बाढी, चक्रवात, हिटवेभ, खडेरी र वनमा डढेलो जस्ता जलवायुसँग सम्बन्धित प्रकोपहरू बढ्ने अनि आगामी वर्षहरूमा अवस्था झनै गम्भीर हुने अनुमान यो प्रतिवेदनले गरेको छ ।
‘अस्ट्रेलियाका मानिसहरूले पहिले नै जलवायु परिवर्तनको असरलाई झेलिरहेका थिए, तर यो कुरा विल्कुल स्पष्ट छ कि हामीले अहिले जति धेरै गर्मीलाई रोक्न सक्छौँ, भावी पुस्ता त्यति नै ठुला सङ्कटहरूबाट बच्न सक्नेछन्’ जलवायु परिवर्तन मन्त्री क्रिस बोवेनले भनेका छन् । विश्वव्यापी तापमान वृद्धिको सन्दर्भमा अस्ट्रेलिया पहिले नै १ दशमलव ५ डिग्रीभन्दा माथि पुगेको प्रतिवेदनले भनेको छ । तापक्रम ३ डिग्रीले बढेमा सिड्नीमा हिटवेभका कारण मृत्यु ४०० प्रतिशतसम्म बढ्ने सक्ने प्रतिवेदनले भनेको छ ।
