मुम्बई प्रहरीले बढायो भारतीय कमेडियन कपिल शर्माको सुरक्षा

नयाँ दिल्ली । भारतीय कमेडियन कपिल शर्माका लागि पछिल्ला केही दिनहरू कठिन रहे । क्यानडामा रहेको उनको क्याफेमा दुई पटक गोली चल्यो ।

यसबाहेक, ग्याङ्स्टर लरेन्स बिश्नोई गिरोहबाट कपिललाई खुलेआम धम्की पनि आयो । यी सबै घटनाहरूलाई विचार गरेर मुम्बई प्रहरीले कपिलको सुरक्षा बढाउने निर्णय गरेको छ । क्यानडामा रहेको कपिलको क्याफेमा दोस्रो पटक गोली चलेपछि यो निर्णय आएको हो । 

पहिलो पटक भएको गोलीबारीको जिम्मेवारी खालिस्तानी आतंककारी हरजीत सिंह लाडीले लिएका थिए । दोस्रो गोलीबारीको घटनाको जिम्मेवारी ग्याङ्स्टर लरेन्स बिश्नोई गिरोहले लियो । अगस्ट ७ मा भएको आक्रमणको ग्याङ्स्टर गोल्डी ढिल्लनले खुलेआम जिम्मेवारी लिएका थिए । सामाजिक सञ्जालमा पोस्ट सेयर गरेर उनले कपिललाई धम्की पनि दिएका थिए ।

‘जय श्री राम, सत श्री अकाल, सबै दाजुभाइलाई राम–राम । आज कपिल शर्माको क्याप्स क्याफेमा भएको गोलीबारीको जिम्मेवारी गोल्डी ढिल्लनले लिएका छन्, उनी ग्याङ्स्टर लरेन्स बिश्नोई गिरोहसँग सम्बन्धित छन् । हामीले उनलाई फोन गरेका थियौँ । तर कुनै जवाफ पाएनौं । त्यसैले हामीले उनीविरुद्ध एक्शन लिएका छौं । उनले फेरि पनि प्रतिक्रिया दिएनन् भने, हामी मुम्बईमा उनको विरुद्ध कारबाही गर्नेछौं,’ पोष्टमा लेखिएको थियो । 

यी सारा धम्की र आक्रमणहरूले उनको सुरक्षाबारे गम्भीर चिन्ताहरू उठाएका छन् । जसका कारण मुम्बईका स्थानीय अधिकारीहरूले द्रुत कारबाही गरेका छन् । कपिलको क्याफेमा दोस्रो आक्रमण हुनुभन्दा केही दिन अघि, सरे प्रहरीका अधिकारीहरू र मेयर खाजा खान कपिलको क्याफेमा पुगेका थिए । यसको भिडियो कपिलले सामाजिक सञ्जालमा शेयर गरेका थिए । 

कपिलको क्याफेमा भएको गोलीबारीपछि लरेन्स विश्नोई ग्याङका ग्याङस्टर ह्यारी बक्सरले अडियो नोट जारी गरेका थिए । यसमा सम्पूर्ण फिल्म उद्योगलाई धम्की दिँदै ज–जसले सलमान खानसँग काम गर्छ, उ आफ्नो हातबाट मर्ने बक्सरले भनेका थिए । सलमानसँग सानो भन्दा सानो काम गर्ने हरेक कलाकार वा फिल्म निर्मातालाई उनले नछोड्ने उनको भनाइ थियो ।