गजल

– डम्बर थामी ‘अनुपम’
झम्के साँझले छोप्नै लागेको गोधूली छ यहाँ
कालो रातले संसार ढाक्नु मामूली छ यहाँ

कुरा गरी साध्य छैन विडम्बना कस्तो हुन्छ
प्रियसीको घाँटी थिच्ने घरमूली छ यहाँ

अपराध दिनदिनै झन् बढीरहेको बेला
दोषीका नाइकेलाई सुनैको फूली छ यहाँ

‘दुधको दूध, पानीको पानी !’ छुट्टयाउनु पर्ने
नून मात्र छ कि कानून खुल्दुली छ यहाँ

भाषणमा सुशासनको चर्को नारा लागे पनि
‘चोरलाई चौतारी, साधुलाई सुली !’ छ यहाँ