गाजामा मानवीय सहायता पर्खिरहेका कम्तीमा ३४ प्यालेस्टिनी इजरायली सेनाबाट मारिए

गाजा । मध्य र दक्षिणी गाजामा मानवीय सहायता पर्खिरहेका गरेका कम्तीमा ३४ प्यालेस्टिनी नागरिक इजरायली गोलाबारीमा मारिएको अस्पताल स्रोतहरूलाई उद्धृत गर्दै अल जजिराले जनाएको छ। शुक्रबार मात्रै गाजाभरिमा कम्तीमा ८२ जना प्यालेस्टिनीको ज्यान गएको बताइएको छ।

डिएर अल-बलाहको पश्चिममा एक घरमा इजरायली लडाकु विमानले आक्रमण गर्दा थुप्रै मानिस मारिएका छन्। अस्पताल स्रोतहरूका अनुसार, मध्य गाजामा ३७ जना मारिएका छन्, जसमध्ये २३ जना सहायता प्राप्त गर्न आएका नागरिक थिए। गाजा सिटीमा २३ र दक्षिण गाजामा २२ जना मारिए, जसमा ११ जना सहायता लिन आएका व्यक्तिहरू थिए।

गाजा ह्युमनिटेरियन फाउन्डेसन (जीएचएफ) ले मे २७ देखि सहायता वितरण सुरु गरेयता, सहायता केन्द्र नजिकै भोकले पीडित नागरिकहरूमाथि इजरायली आक्रमणबाट सयौँको मृत्यु भइसकेको छ। संयुक्त राष्ट्रसंघले इजरायल र अमेरिकाको समर्थनमा गठित जीएचएफ समूहलाई सहायता सुरक्षित रूपमा वितरण गर्न नसकेको भन्दै आलोचना गरेको छ।

मार्चको सुरुबाट मेको अन्त्यसम्म इजरायले गाजामा पूर्ण नाकाबन्दी लगाएको थियो, जसले महामारीको अवस्थामा पुर्‍याएको चेतावनी विभिन्न सहायता संस्थाहरूले दिइसकेका छन्। गाजाको सरकारी सञ्चार कार्यालयका महानिर्देशक इस्माइल अल-थावबटाले बिहीबार भनेअनुसार, सहायता लिन खोज्ने कुल ४०९ नागरिकको ज्यान गइसकेको छ भने ३,२०३ जना घाइते भएका छन्।

सम्पूर्ण गाजा हाल भोकमरी र मानवीय सङ्कटको चरम स्थितिमा पुगेको अन्तर्राष्ट्रिय समुदायले स्वीकार गरेका छन्।
अल जजिरा