आनन्द हस्पिटलका सञ्चालक जयसवाल पक्राउ

राैतहट ।  शिवनगरस्थित आनन्द हस्पिटलका सञ्चालक उमेश प्रसाद जयसवाललाई प्रहरीले पक्राउ गरेको छ । मापदण्ड पूरा नगरी अस्पताल सञ्चालन गरेको पाइएपछि जयसवाललाई नियन्त्रणमा लिएको रौतहट प्रहरी प्रमुख एसपी दिलीप घिमिरेले जानकारी दिए।

मधेश प्रदेशका मुख्यमन्त्री सतीशकुमार सिंहले केही दिनअघि हस्पिटल अनुगमनका क्रममा मापदण्ड पूरा नगरेको पाएपछि बन्द गर्न निर्देशन दिएका थिए। तर, जयसवालले मुख्यमन्त्रीको उक्त आदेश अवज्ञा गर्दै नयाँ बिरामी भर्ना गरी ठगी धन्दा जारी राखेका थिए ।हस्पिटलमा मापदण्डअनुसारका चिकित्सक,उपकरण र पूर्वाधार अभाव रहेको देखिएको थियो ।  उच्च शुल्क असुल्दै अवैधानिक रूपमा सञ्चालन भइरहेको जानकारी पाएपछि प्रहरीले आज उनलाई पक्राउ गरेको हो।

जिल्ला प्रहरी कार्यालय रौतहटका प्रवक्ता डीएसपी दीपक कुमार रायले सञ्चालक जयसवाललाई पक्राउ गरी सोधपुछ गर्ने कार्य भइरहेको बताएका  छन्।