जुम्लामा ढिस्कोले पुरिएर एकजनाको मृत्यु
दिप्शन गुरुङ
२०८१ चैत्र १६ | मध्यान्ह ०३:१२ बजे
जुम्ला । जुम्लामा माटोको ढिस्कोले पुरिएर शनिबार एकजनाको मृत्यु भएको छ । घर लिपपोत गर्न माटो ल्याउन गएकी चन्दननाथ नगरपालिका– ६ की २५ वर्षीया विमला सुनारको मृत्यु भएको जिल्ला प्रहरी कार्यालयका प्रहरी नायब उपरीक्षक छेदिलाल कामतीले जानकारी दिए ।
चन्दननाथ–४, मालाभिडमा माटो निकाल्दै गर्दा एक्कासि ढिस्को खसेपछि विमला पुरिएकी थिइन् । उनी गाउँकै ६ जनाको समूहमा माटो ल्याउन गएकी थिइन् ।
उनको शव परीक्षणका निम्ति कर्णाली स्वास्थ्य विज्ञान प्रतिष्ठान लगिएको प्रहरीले जनाएको छ ।
