बर्षाका कारण पाल्पामा सिद्धार्थ राजमार्ग संगै ग्रामिण सडक अबरुद्ध

असिम कामु मगर
पाल्पा । अविरल वर्षासँगै पाल्पाका विभिन्न स्थानमा सडकहरु अबरुद्ध भएका छन् । पाल्पा बुटवल सडक खण्डको सिद्धार्थ राजमार्ग, तानसेन तम्घास सडक खण्ड, आर्यभन्ज्यांग रामपुर सडक खण्ड, तानसेन रानीमहल सडक खण्ड लगायतका सडकहरु पहिरोको कारण अबरुद्ध भएको जिल्ला प्रहरी कार्यालय पाल्पाले जनाएको छ ।

तीनदिन देखि परेको वर्षातका कारण समेत सडक खुलाउनको लागि समस्या भइरहेको प्रहरीले जनाएको छ । डिभिजन सडक कार्यालय पाल्पाका सूचना अधिकारी शिबु खत्रीका अनुसार सिद्धार्थ राजमार्गको गौडेपुल, पानीमिल, सिद्धबाबा लगायतका क्षेत्रमा लगातार पहिरो झरिरहेको छ ।

सडक डिभिजन बुटवल र पाल्पाको समन्वयमा सडक खुलाउने प्रयास जारी रहेको छ ।

घरबाट यात्रा नगर्न प्रशासनको आग्रह
पाल्पाका सबै जसो ग्रामिण सडकहरु पहिरोका कारण अवरुद्ध भएका छन् । जिल्लाका विभिन्न गाउँ गाउँसम्म पुग्ने ग्रामीण सडकहरु माथिबाट झरेको पहिरो, ढुंगाका कारण अवरुद्ध भएका हुन् ।

स्थानीय तह, प्रहरी, सडक डिभिजन, सेना, शसस्त्र लगायतको समन्वयमा सडक खुलाउने प्रयास भने जारी रहेको प्रहरीको भनाई छ ।

वर्षातसुरु भएको र अधिकांश स्थानमा पहिरो झर्ने भएकाले सकेसम्म घरबाट यात्रा नगर्न र यात्रा गर्नुपरेमा प्रहरीलाई बुझेर मात्रै यात्रा गर्न सर्व साधारणलाई पाल्पा प्रशासन र प्रहरीले आग्रह समेत गरेको छ ।