धरानमा डेंगीबाट थप एक महिलाको मृत्यु

सुनसरी, साउन २१ । धरानमा डेंगी संक्रमणबाट थप एक जनाको मृत्यु भएको छ । धरान उपमहानगरपालिकाको स्वास्थ्य महाशाखाका प्रमुख उमेश मेहताका अनुसार ३५ वर्षीया महिलाको उपचारको क्रममा विराट नर्सिङ होममा साउन १८ गते मृत्यु भएको हो ।

योसँगै धरानमा डेंगीबाट मृत्यु हुनेको संख्या ९ जना पुगेको छ । महाशाखा प्रमुख मेहताका अनुसार मृतक महिला वडा १४ को भएको जानकारी पाएकोले मृतक परिवारसँग सम्पर्क गरेर थप जानकारी लिने प्रयास भइरहेको पनि उनले बताए । अधिकांश घरमा एक देखि ९ जनासम्म बिरामी पाइएकाले धरानमा मात्र हालसम्ममा डेंगी संक्रमितको संख्या २५ हजार नाघेको अनुमान गरिएको महाशाखा प्रमुख मेहताले बताए ।

उनका अनुसार धरान उपमहानगर र वडाहरुले सञ्चालन गरेको विभिन्न स्वास्थ्य शिविरमा जाँच गर्न आएका ५ हजार २ सय ४२ जनामध्ये ३ हजार २ सय १३ जनामा डेंगी पोजेटिभ रिपोर्ट देखिएको छ ।