बुधबार बस्ने संघीय संसदको बैठकका लागि यस्तो छ पूर्व तयारी

काठमाडौं । भोलि (बुधबार) अपराह्न ४ बजे संघीय संसद् अन्तर्गत प्रतिनिधि सभा र राष्ट्रिय सभाको बैठक बस्ने भएको छ । बैठकका लागि सम्पूर्ण तयारी पूरा भएको संघीय संसद सचिवालयले जनाएको छ ।

संसद सचिवालयले भौतिक दुरी कायम हुने गरी सिट ब्यवस्था गरेको, सांसदको बैठक कक्षमा प्रवेश गर्नुअघि ज्वोरो चेक गर्ने, स्यानिटाइजर, मास्क लगायतको व्यवस्थापन गरेको संघीय संसदका प्रवक्ता डा. रोजनाथ पाण्डेले जानकारी दिए । साथै यो पटक संसद बैठक बस्नुअघि कोरोना परिक्षण भने नगरिने भएको छ ।

सरकारले लकडाउनको अन्त्य गरेर सामान्य अवस्था बनेको र सम्पूर्ण सांसदहरुलाई कोभिड बिरुद्धको दोश्रो मात्रा खोप लगाइएकाले कोरोना परिक्षण नगरिने प्रवक्ता पाण्डेले बताए । संसद बैठकको संभावित कार्यसूची तय गर्नका लागि बैठक बस्दै गरेको उनको भनाइ छ ।

गत साउन ३२ गते सरकारले संसद अधिवेशन अन्त्य गरेर दल विभाजन सम्बन्धी अध्यादेश ल्याएको थियो । सरकारको सिफारिसमा राष्ट्रपति बिद्या देवी भण्डारीले बुधबारका लागि संघीय संसद बैठक आह्वान गरेकी हुन् ।